भांगरभूंय | प्रतिनिधी
केपें: धर्मीक थळा वयल्यान कोणाच्याय धर्माचेर उलोवप हें चुकीचें आसा. तातूंतल्यान तणाव निर्माण जायत आसता. हे खातीर हेतुपुरस्सर उलोवप टाळूंक जाय अशें समाज कल्याण मंत्री सुभाष फळदेसाय हांणी सांगलें.
ते तिळामळ-केप्यां भौशीक गणेशोत्सव मंडळाच्या देणगी कुपनाच्या शुभारंभ कार्यावळींत उलयताले.
ह्या वेळार माचयेर भौशीक बांदकाम मंत्री निलेश काब्राल, आदले उपमुख्यमंत्री चंद्रकांत कवळेंकार, आदले मंत्री डॉमनीक फर्नांडीस, केपेंची नगराध्यक्षा सुचिता शिरवयकार, शेल्डेंची सरपंच कविता गांवस देसाय, उपसरपंच प्रमोद गांवस देसाय. मंडळ अध्यक्ष निलेश गांवस देसाय आनी हेर मानेस्त हाजीर आशिल्ले.
जाहीर सभेंत राजकारणाचेर उलयतात, पूण ताचें कोण मनाक लावन घेनात. पूण एका धर्मीक सुवाते वयल्यान प्रचार-अप्रचार जाता तो बंद जावप गरजेचें आसा. हिंदू, मुस्लीम, क्रिस्तांव भावांनी आपलेपणाचीं नातीं सांबाळ्ळ्यांत. तशेंच गोंयकारपणूय राखलां. अशे माचये वयल्यान सगल्यांचे संबंद आनीक घटमूट जायत आसतात अशें सुभाष फळदेसाय हांणी सांगलें.
ह्या दिसांनी जें कितें चल्लां तें जावचें न्हय. लोकांची दिशाभूल करप, एकवटा मदीं फूट पाडप योग्य न्हय. भौशीक गणेशोत्सव मंडळ सगल्या धर्माच्या लोकांक बराबर घेवन मुखार वता. अशा कार्यांत सगल्यांनी हातभार लावचो अशें मंत्री निलेश काब्राल हांणी म्हणलें.
ह्या वेळार उपमुख्यमंत्री चंद्रकांत कवळेंकार हांचेंय उलोवप जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
