धनगर समाज आजूनय आदिवासी आरक्षणा विणें

भांगरभूंय | प्रतिनिधी

20 वर्सां सावन जाता अन्याय, खर पावलां उबारपाक समितीची निवड

वाळपय: राज्यांतलो गवळी धनगर समाज फाटल्या 20 वर्सां सावन आदिवासी आरक्षण मेळटलें ही आस्त धरून आसा. येवपी लोकसभा वेंचणुके पयलीं हें आरक्षण मेळटलें काय ना, ह्या विशयाचेर गवळी धनगर समाजा मदीं अस्वस्थताय निर्माण जाल्या. मोदी सरकाराक 9 वर्सां जावन लेगीत आजूनय हो प्रस्न सुटना हे विशीं समाजान तिडक उक्तायल्या. ह्या विशयाचेर समाजांतल्या फुडार्‍यांनी फाटपुरवण करून लेगीत आजूनय येस मेळना. देखून हे संबंदी खर पावलां उबारपा खातीर एके कृती समितीची स्थापना केल्या. समाजाचेर जावपी अन्याया आड फुडाराक संघर्श जावपाची शक्यताय आसा.
राज्यांतलो गवळी समाज हो खरो आदिवासी समाज आशिल्ल्यान ह्या समाजाक आरक्षण मेळचे खातीर राज्य सरकारान सगळ्यांत पयलीं क्रेंद्र सरकाराक अहवाल धाडिल्लो. पूण, 2003 वर्सा ह्या समाजाक सोडून हेर तीन समाजांक आदिवासी आरक्षण लागू केलें. तेन्ना हो समाज कांय काळ निर्शेलो. पूण हेर दोन समाजांक हो दर्जो मेळिल्ल्यान तांणी ह्या निर्णयाक येवकार दिलो आनी धनगर समाजाकूय आरक्षण दिवन हो जाल्लो अन्याय पयस करपाची मागणी केल्ली. 2003 उपरांत आयिल्ल्या दरेका सरकारा कडेन ह्या समाजान ही मागणी केल्ली. पूण राज्य वा केंद्र सरकारान ह्या समाजाक आजून मेरेन न्याय दिवंक ना.
भारतीय जनता पक्षान ह्यान पयलीं जाल्ल्या लोकसभा आनी विधानसभा वेंचणुकेच्या जाहीरनाम्यांत धनगर समाजाक अनुसूचीत जमातीचें आरक्षण मेळोवन दिवपाची गवाय दिल्ली. पूण आजूनय हो विशय सुटनाशिल्ल्यान गवळी धनगर समाजांतल्या सुशिक्षीत पिळगेन तिडक उक्तायल्या.

राज्यांतल्या 12 य म्हालांनी आशिल्ल्या ह्या समाजाची लोकसंख्या 30 ते 35 हजार अशी आसा. दक्षीण गोंय लोकसभा मतदारसंघांत व्हडा प्रमाणांत ह्या समाजाची लोकवसणूक आसा. राज्यांत ह्या समाजाचो मतदार आंकडो 22 ते 25 हजारां वयर आसा.

ह्या समाजाचेर जाल्ल्या अन्यायाचेर गोमंतक धनगर समाज उन्नती मंडळा वतीन समाजाचे फुडारी तशेंच आदले उपमुख्यमंत्री बाबू कवळेंकार हे फाटपुरवण करीत आसता.

मजगतीं राज्यांतल्या आदिवासी समाजाक 2027 वर्सा जावपी विधानसभा वेंचणुकेंत राखीव मतदारसंघ दवरचो हे विशीं विधानसभेंत थाराव मंजूर जालो. पूण फाटल्या 20 वर्सां सावन आदिवासी आरक्षणा पसून पयस आशिल्ल्या गवळी धनगर समाजा विशीं खंयचें धोरण आखलां हें मुख्यमंत्र्यान सांगूंक ना. ताका लागून सरकार ह्या समाजा विशीं खरेंच गंभीर आसा काय? असो प्रस्न समाजाच्या फुडार्‍यांनी उक्तायला.