देशाच्या दरेका गांवांत येतलें उदक

भांगरभूंय | प्रतिनिधी

भांगरभूंय । खबरां संस्था
संवसारीक भलायकी संघटनेच्या अहवाला प्रमाण, भारतांत सगळे कडेन सुरक्षीत आनी वेवस्थापन केल्ल्या पिवपाच्या उदकाची पुरवण केल्यार अतिसाराच्या दुयेंसांक लागून सुमार चार लाख लोकांक येवपी मरण आडावं येता. तशेंच, सुमार 8.2 लाख कोटी रुपया मेरेन खर्च वाचतलो. गांवगिर्‍या वाठारांतल्यो बायलो आनी किशोरवयीन चलयो आपलो चडसो वेळ आनी उर्जा दिसपट्ट्या वापरा खातीर उदक हाडपाक घालयतात. ताका लागून उत्पन्न मेळोवपाच्या संदींत बायलांचो वांटो उणो जाता, जाल्यार चलयांक शाळेंत वचपा खातीर वेळ मेळना. तांचे भलायकेचेर वायट परिणाम जाता.

…. तर वेळ वाटावतलो

घरांत पिवपाच्या उदकाची उपलब्धताय सुनिश्चीत केल्यार गांवगिर्‍या लोकांची भलायकी आनी समाजीक, आर्थीक दर्जो सुदारतलो, खासा करून बायलांचो. त्यो आनी चलयो जे त्रास घेतात ते उणे जातले. ह्या अहवाला प्रमाण गांवगिर्‍या वाठारांतल्या दरेका कुटुंबाक नळाच्या उदकाची पुरवण केल्यार उदक भरपाक लागपी वेळ (सदांच 5.5 कोटी वरां) वाचतलो. जोड राष्ट्रांच्या शाश्वत उदरगत ध्येय (एसडीजी) 6.1 प्रमाण 2030 मेरेन सगळ्यां खातीर सुरक्षीत आनी परवडपी पिवपाच्या उदकाची सगल्याक पुरवण करपाचें ध्येय निश्चीत केलां.

12.7 कोटी घरांनी नळ

भारत सरकारान राज्य आनी केंद्रीय प्रदेशां वांगडा भागीदारी करून ‘जल जीवन’ मिशना वरवीं ‘हर घर जल’ येवजण चालीक लायल्या. हाचे वरवीं 2024 मेरेन देशांतल्या गांवगिर्‍या वाठारांतल्या दरेका घराक नळाच्या उदकाची पुरवण करपाचो भारत सरकाराचो हेत आसा.