भांगरभूंय | प्रतिनिधी
मार्रा-पिळर्ण निम्स धिल्लन खून प्रकरण
म्हापशें: मार्रा-पिळर्ण हांगासरल्या हॉरिझन्स आझुरा प्रकल्पांतल्या एका व्हिलाचो धनी आनी हॉस्पिलिटी वेवसायीक नरोत्तम सिंग उर्फ निम्स धिल्लन (77, मूळ पंजाब) हांच्या खून प्रकरणांत अटक केल्लो दुबावीत आरोपी जितेंद्र साहू (32, भोपाळ) आनी नितू राहुजा (22, भोपाळ) हांकां म्हापशें न्यायालयान 10 दिसांची पुलीस कोठी दिल्या. दुबावितां कडल्यान पुलिसांनी लुटीतले 47.82 लाखांचो म्हालवज जप्त केला.
निम्स सिंग धिल्लन हांचो खून केले उपरांत तांच्या व्हिालांतलो म्हालवज लुटून गोंयांतल्यान पळ काडिल्ल्या दोगांय दुबावितांक वाशी टोल नाक्यार नवी मुंबय गुन्यांव फांट्याच्या वाशी पंगडान अटक केली. गेस्ट आसतना मयत निम्स सिंग धिल्लन हांणी दुबावीत तरणाटे कडेन गैरवर्तणूक केल्ल्याचे तिडकीतल्यान तांचो खून केल्ल्याची कबुली दुबावितांनी वाशी पुलिसांक दिल्ली.
सोमारा 5 वेर दनपारां पर्वरी पुलीस पंगड दुबावितांक मुंबयंतल्यान ट्रांझीट रिमांडाचेर घेवन गोंयांत दाखल जाले. उपरांत म्हापशें न्यायालयांत दुबावितांक पुलिसांनी हजर केले.
आयतारा 4 वेर सकाळीं धिल्लन हे आपल्या व्हिलांतले बेडीर मरण आयिल्ले अवस्थेंत सांपडले. तांचो चेरो आनी कुडीचेर जखमो आशिल्ल्यो. तशेंच तांच्या आंगा वेल्यो भांगराच्यो वस्ती, मोबायल फोन आनी तांची भाड्यान घेतिल्ले मोटारी सयत व्हिलांतलो म्हालवज गायब आशिल्लो. ताका लागून हो चोरये खातीर खुनाचो प्रकार घडिल्लो आसुये असो दुबाव पुलिसांनी उक्तायिल्लो.
हॉस्पिलिटी वेवसायीक आशिल्ल्यान शेनवारा 3 वेर रातीं धिल्लन हांच्या व्हिलाचेर कांय गेस्ट आयिल्ले. तांचो पर्वरी पुलिसांनी थाव घेवपाचो यत्न केलो तेन्ना दुबावीत जितेंद्र आनी नितू हे दोगूय धिल्लन हांणीच व्हिलाच्या प्राकारांत आशिल्ली भाड्याची फॉर्च्यूनर ही खाजगी मोटार घेवन पळून गेल्ल्याचें पुलिसांच्या लक्षांत आयलें.
हे मोटारीक जीपीएस ट्रॅकर आशिल्ल्यान पुलिसांनी सोद घेतलो आनी वाशी हांगा नवी मुंबय गुन्यांव फांट्याच्या पंगडाच्या आदारान ताब्यांत घेतले. दुबावितांची चवकशी करतकूच नवी मुंबय गुन्यांव फांट्याच्या पुलिसांनी तांकां अटक केली आनी तांचे कडल्यान चोरयेचे 47.82 लाख रुपयांचो म्हालवज जप्त केलो.
ह्या दोगांय दुबावितांक काल (सोमारा) दनपारां म्हापशेंच्या न्यायालयांत हजर करतकूच न्यायालयान तांकां 10 दिसांची पुलीस कोठी दिल्या. मजगतीं, धिल्लन हे पंजाबच्या एका आदल्या मुख्यमंत्र्याचे सोयरे आशिल्ले.
ह्या प्रकरणांत पर्वरीचे पुलीस निरिक्षक राहूल परब हे पुलीस अधिक्षक निधीन वाल्सन आनी उपअधिक्षक विश्वेश कर्पे हांच्या मार्गदर्शना खाला तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
