भांगरभूंय | प्रतिनिधी
13 फेब्रुवारीक सुनावणी
पणजी: नागवा हांगा रवी शिरोडकार (कळंगूट) हाचेर सुरी हल्लो प्रकरणांतलो मुखेल दुबावीत टार्झन पार्सेकार आनी सागर उर्फ क्षेत्रपाल संतोष पाटील ह्या दोगांनी मुंबय उच्च न्यायालयाच्या गोंय खंडपिठान सशर्त जामीन मंजूर केल्लो. मजगतीं वयल्या दोगांनीय अटीचें उल्लंघन केल्ल्याचो दावो करून हणजूण पुलिसांनी दोगांचो जामीन रद्द करपा खातीर उच्च न्यायालयांत याचिका दाखल केल्या. ह्या प्रकरणांत दोगांकूय नोटीस दिवन फुडली सुनावणी 13 फेब्रुवारी दिसा दवरल्या.
नागव्यां रवी शिरोडकार हाचेर 1 ऑक्टोबर 2022 दिसा खुनी हल्लो केल्लो. ह्या प्रकरणांतलो मुखेल दुबावीत टार्झन पार्सेकार हाचो त्या दिसा वाडदीस आशिल्लो. ते फाटभुंयेर ताणें कळंगूटे एक्स नायट क्लबांत पार्टी दवरिल्ली. ते खातीर तो आनी ताचे वांगडी कळंगूटे वताले. ह्याच वेळार रवी शिरोडकार आनी ताचे वांगडी दुबावीत टार्झन हाचे नदरेक पडले. ह्या वेळार तांचे मदीं मारपेट जाली. रवी शिरोडकार हाचेर सुरी हल्लो केलो. ह्या प्रकरणांत हणजूण पुलिसांनी मुखेल दुबावीत टार्झन पार्सेकार आनी सागर उफ क्षेत्रपाल संतोष पाटील हांचे सयत हेरां आड गुन्यांव दाखल करून त्या दोगांक अटक केल्ली.
न्यायालयान दुबावितांक पयली पुलीस कोठी दिली. ती सोंपले उपरांत न्यायालयीन कोठी दिल्ली. हातूंतले वयले दुबावीत टार्झन पार्सेकार आनी सागर उर्फ क्षेत्रपाल संतोष पाटील ह्या दोगांनी पणजेंतल्या उत्तर गोंय जिल्हो आनी सत्र न्यायालयांत ज जामीन अर्ज दाखल केल्लो. तो भायरायले उपरांत त्या दोगांनीय उच्च न्यायालयांत जामीन दाखल केलो तेन्ना त्या दोगांक उत्तर गोंयांत प्रवेश करपाक मनाय करीत सशर्त जामिनाटर सुटका केल्ली.
मजगतीं, वयल्या दुबावितांनी 4 जानेवारी 2024 दिसा नागव्यां एका मनशाक आनी ताच्या 9 वर्सा पिरायेच्या भुरग्याक मारपेट केली. ह्या प्रकरणांत हणजूण पुलिसांनी दुबावीत टार्झन पार्सेकार आनी सागर उर्फ क्षेत्रपाल संतोष पाटील हांचे आड गुन्यांव दाखल केलो. मजगतीं रवी शिरोडकार हल्लो प्रकरणांत जामिनार आशिल्ल्या वयल्या दोगांकूय उच्च न्यायालयाच्या आदेशाचो अवमान केल्ल्यान तांचो जामीन रद्द करपा खातीर याचिका दाखल केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
