भांगरभूंय | प्रतिनिधी
धारबांदोडें : दुदसागर घसघश्याचेर ट्रेकींग सुरू करपाचे नदरेन आपणें मुख्यमंत्री डॉ. प्रमोद सावंत आनी रानां अधिकार्यां कडेन भासाभास केल्या. कांय दिसांनी ट्रेकिंग सुरू जातलें. मायडा आनी सौझामळ हांगां वचपा खातीर रेल्वे उड्डाण पुला विशीं आपूण संबंदीत यंत्रणे कडेन फाटपुरवण करतां अशी म्हायती आमदार गणेश गांवकार हांणी दिली.
कुळे- शिगांव पंचायत वाठारांतल्या सौझामळ हांगा स्वयंपूर्ण गोंय पंचायत निधींतल्यान सुमार पंदरा लाख रुपया खर्चून बांदिल्ल्या आंगणवाडी इमारतीचें उक्तावण केले उपरांत ते उलयताले. ह्या वेळार तांचे वांगडा माचयेर धारबांदोडें जिल्हो पंच वांगडी सुधा गांवकार, कुळें-शिगांव सरपंच गोविंद शिगांवकार, उपसरपंच नेहा मडकयकार, पंच वांगडी साईश नायक, अनिकेत देसाय, अजय बांदेकार, बेनी आजावेदो, सोनम डोईफोडे, प्रसाद गांवकार आनी पंचायत सचीव भूषण तावडे, साकोड्डेंचे उपसरपंच शिरीष देसाय, मोलेंचे सरपंच कपील नायक हाजीर आशिल्ले.
पंचायत वाठारांतल्या दरेका प्रभागांत जीं उदरगतीचीं कामां करपाचीं आसात तांचो प्रस्ताव तयार करून खंयचें काम पयलें करचें हें प्रस्तावांत नमूद करचें. येवपी तीन-चार वर्सांत एकूय काम उरचें ना हे खातीर आपूण यत्न करतलों. पंचायत वाठारांत जे बारीक सारीक साकोव मोडपाक पावल्यात ते नवे बांदपाची निविदा गेल्ल्याची तांणी सांगलें.
सौदामळ हो वाठार उदरगतीचे नदरेन फाटीं उरला. येवपी काळांत ह्या वाठारांतल्या भितरल्या रस्त्यांचें डांबरीकरण करतले. तशेंच हेर कामांकूय म्हत्व दितले.कुळेंचो उदक शुद्धीकरण प्रकल्प निमाण्या टप्प्यांत आशिल्ल्यान तो पुराय जाले उपरांत पिवपाच्या उदकाची समस्या पयस जातली अशें गणेश गांवकार हांणी फुडें म्हणलें.
जिल्हो पंचायत निधींतल्यान अंगणवाडी मुखार साबितीकरण करपाचो आपूण यत्न करतलों, अशें आस्वासन जिल्हो वांगडी सुधा गांवकर हांणी दिलें. ह्या वेळार बालवाडींतल्या विद्यार्थ्यांनी गायिल्ल्या येवकार गीताची तोखणाय तांणी केली.
आमदार गांवकार हांच्या सहकार्यान कुळें पंचायतीची उदरगत करतलों. तांणी विधानसभा अधिवेशनांत गोंयच्या तशेंच सावर्डे मतदारसंघांतले खुबशे प्रस्न अभ्यास करून मांडल्यात अशें सरपंच गोविंद शिगांवकार हांणी सांगलें.
उपसरपंच नेहा मडकयकार हांणीय विचार मांडले. सुत्रसंचालन तांणीच केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
