भांगरभूंय | प्रतिनिधी
पणजी: दोनापावलाच्या मणिपाल हॉस्पिटल्सांत आयज दिव्यांग भुरग्यांच्या पालकां खातीर जागृताय कार्यावळ आयोजीत केल्ली.
ह्या वेळार मुखेल सोयरे म्हणून समाज कल्याण मंत्री सुभाष फळदेसाय हाजीर आशिल्ले. तशेंच गोंय दिव्यांग राज्य आयुक्त गुरूप्रसाद पावसकार मानाचे सोयरे आशिल्ले. वेगळे क्षमतेचे तरणाटे कार्यकर्ते कृणाल ठाकूर हांणी दिव्यांग भुरग्यांच्या पालकांक हे कार्यावळीक हाडपाची जापसालदारकी घेतली.
मणिपाल हॉस्पिटल्स गोंयचें संचालक सुरेंद्र प्रसाद, हॉस्पिटलाचे ऑन्कोलॉजी विभागाचे मुखेली डॉ. शेखर साळकार, ईएनटी सर्जन डॉ. मूर्ती, विक्री आनी विपणन विभाग मुखेली हरी प्रसाद आनी हेर ह्यावेळार हाजीर आशिल्ले.
डॉ. जेसिका पिंटो हांणी विशेश भुरग्यांच्या मुखार येवपी आव्हानां आनी तांकां कशे तरेन तोंड दिवप हे विशीं मार्गदर्शन केलें.
कृणाल ठाकूर हांणी दिव्यांगाचे प्रकार, तांचे हक्क, तांचे खातीर नोकरेच्यो संदी आनी तांच्या हक्काच्या कायद्यां विशीं म्हायती दिली.
मंत्री सुभाष फळदेसाय आनी गुरुदास पावसकार हांणी विशेश गरजो आशिल्ल्या भुरग्यांच्या बालरोग विकासा खातीरच्या ह्या आगळ्या वेगळ्या केंद्रा खातीर मणिपाल हॉस्पिटलाची तोखणाय केली. तशेंच दिव्यांग आसून लेगीत विशेश भुरग्यांच्या पालकां मेरेन पावून तांचे फाटबळ वाडोवपा खातीर तांणी कृणाल ठाकूर हांची तोखणाय करून तांकां परबीं भेटयलीं.
सुरेंद्र प्रसाद, डॉ. शेखर साळकार आनी डॉ. मुर्ती हांणी जागृताय कार्यावळीक हाजीर राविल्ले खातीर मुखेल सोयर्यांचे तशेंच विशेश भुरग्यांच्या पालकांचे उपकार मानले.
ह्या वेळार पालक व्हडा संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
