दिवचल पेपर स्प्रे : एके चलये सयत पांच विद्यार्थी निलंबीत

भांगरभूंय | प्रतिनिधी

हो पेपर स्प्रे आसचो ना : जाणकारांचो दुबाव

दिवचल, प्रतिनिधी : हांगाच्या शांतादुर्गा हायर सेकंडरींतल्या पेपर स्प्रे प्रकरणाचे मुळावे चवकशे उपरांत पांच विद्यार्थ्यांक एक म्हयन्या खातीर निलंबीत केल्यात. हातूंत एक चली आसा.
बिरेस्तारा दनपरां स्वासाचो त्रास जावपाक लागिल्ल्यान बारा विद्यार्थ्यांक दिवचल आनी म्हापश्यां हाॅस्पिटलांत दाखल केल्लीं. तातूंतल्या इकरा विद्यार्थ्यांक घरां धाडल्यांत, तर एके विद्यार्थिनीक रातीं त्रास जाल्ल्यान बांबोळे जीएमसींत व्हेली. तिची भलायकी आतां बरी आसा.
आयज शुक्रारा सकाळीं शिक्षण उपसंचालक मनोज सावयकार, शालेय वेवस्थापनाचे पदाधिकारी, पालक, शिक्षक संघाचे पदाधिकारी हांची जोड बसका जाली. उपरांत सावयकार हांणी त्या वर्गाची पळोवणी केली. शिक्षक आनी कर्मचाऱ्यां कडेन चर्चा केली.
हाचे पयलीं ११ ऑगस्टाक अशीच घडणूक घडिल्ली. कालचे घडणुकेचो बारीकसाणेन तपास करपाचे आदेश मुख्यमंत्री प्रमोद सावंत हांणी दिल्यात. ताचे पयलीं शिक्षण खात्यान वेवस्थापनाक कारणां दाखयात नोटीस धाडिल्ली. आयज शिक्षण खात्याचो पंगड थंय पावलो आनी तपासणी केली. उपरांत मंडळाचे अध्यक्ष विजय सरदेसाय हांणी चवकशी करून पांच विद्यार्थ्यांक एका म्हयन्या खातीर निलंबीत केल्यात अशें सांगलें.
संस्थेचे इमारतींत, भायर सीसीटीव्ही कॅमेरे आसात. आज आनीक 22 कॅमेरे लायल्यात. ह्या प्रकरणा संबंदी वेवस्थापन खर भुमिका घेतलें, अशेंय सरदेसाय हांणी सांगलें.

कमिटी स्थापन

मजगतीं, शिक्षण खात्याच्या आदेशा प्रमाण ह्या प्रकरणाची चवकशी करपाक एक उच्च स्तरीय समिती नेमल्या. ती रोखडोच आपलो अहवाल सादर करतली.
राज्यसभा खासदार सदानंद तानावडे हांणी आयज विद्यालयाक भेट दिवन प्रकरणाची योग्य चवकशी करची, अशें वेवस्थापनाक सांगलें.

पेपर स्प्रे काय भलतेंच कितें?

हाॅस्पिटलांतल्या सुत्रांनी दिल्ले म्हायती प्रमाण, पेपर स्प्रेचो इतलो त्रास जावप शक्य ना. सुरवातीक दोळे, नाक चुरचुरतलें. मात भुरगीं बेशुद्ध जालीं हाचो अर्थ हो कसलो तरी वेगळो स्प्रे आसतलो. तें नेमकें कसलें रसायन तें कळूंक ना. त्या पांचूय भुरग्यांक ताब्यांत घेवन चवकशी केल्यार नेमकें कितें फवारलें तें कळटलें. एके चलये कडेन सिगारेट मेळिल्ल्याची चर्चा गांवभर चालू आसा. तातूंत कितें रसायन आशिल्लें ताची पुलिसांनी चवकशी करची अशी मागणी पालकांनी केल्या.

घडणुके फाटलें कारण कितें?

हो पेपर स्प्रे त्या चलयांचेर मारपा फाटलें कारण कितें, ताची मुखेलपणान चवकशी जावंक जाय. सहज मस्ती, फकांडां म्हूण तो मारिल्लो काय हे घडणुके फाटल्यान आनीक कितें कारण आसा, ताचो सोद घेवपाक जाय, अशें मत पालकांनी उक्तायलां.