भांगरभूंय | प्रतिनिधी
भांगरभूंय । प्रतिनिधी
दिवचलः दिवचल नगरपालिकेची कर थकबाकी 5 कोटींच्या घरांत पावल्ल्यान पालिकेची अर्थीक स्थिती कोसळपाच्या मार्गार आसा. खर्च कमी करून थकबाकी वसुलीचेर लक्ष दिवपाचें तशेंच जे कोणी थकबाकी भरपा कडेन आडनदर करतात तांचेर खर कारवाय करपाचो थाराव पालिका मंडळाचे बसकेंत मानून घेतला. नगराध्यक्ष कुंदन फळारी हाचे येजमानके खाला पालिकासभाघरांत घेतिल्ले हे बसकेक नगरसेवक अनिकेत चणेकार, सुखदा तेली, नीलेश टोपले, अपर्णा फोगेरी, विजयकुमार नाटेकार, दीपा शिरगांवकार, रियाज बेग, सतीश गांवकार, तनुजा गांवकार, रंजना वायंगणकार, सुदन गोवेकार, गुंजन कोरगांवकार, मुख्याधिकारी सचीन देसाय हाजीर आशिल्ले.
पालिका मार्केट संकुलांत सोऱ्याच्या दुकानांक परवानो दिवपा वयल्यान बसकेंत कांय वेळ खडाजंगी जाली. मार्केटांतल्या एका गाळेधारकाक सोऱ्याचे दुकान सुरू करपा खातीर परवानो दिवपाचो बिशय हाचे पयलीं जाल्ले बसकेंत बरोच गाजल्लो. ते बसकेंत पालिकेन थाराव घेवंन तो कार्यवाही खातीर पालिका प्रशासन खात्याक धाडल्लो. खात्यान घेतल्लो निर्णय कालचे बसकेंत वाचून दाखयलो. पालिका प्रशासनान दिल्लो वेपार परवानो आता फाटीं घेवपाक मेळचो ना असो पवित्रो सत्ताधारी पालिका मंडळान घेतिल्ल्यान नगरसेविका अपर्णा फोगेरी आनी सुखदा तेली हांणी ताका आक्षेप घेतलो. सोऱ्या दुकानाक आमचो विरोध आसा अशें तांणी सांगलें.
पालिकेच्या अर्थीक उत्पन्ना विशीचे चर्चे वेळार मुख्याधिकाऱ्यान पालिकेची थकबाकी पांच कोटीच्या घरात पावल्ल्याची म्हायती दिवंन फाटल्या स म्हयन्यां सावन वसुली खातीर संबंदितांत पत्रां धाडल्यांत. वसुली खातीर खासा मोहीम सुरू आसा अशी म्हायती दिली. वेगवेगल्या बिलां खातीर पालिका 1 कोटी 66 लाख रुपये देणे आसा अशेंय ताणे सांगलें. विशेश पंगड तयार करून वसुलीचेर भर दिवपाचें तशेंच पालिकेचो खर्च उणो करपाचो बसकेंत निर्णय घेतलो. पालिकेची वाहनां आनी हेर खर्चाचेर नगरसेवकांनी चर्चा केली.
कांय लोकांनी घरांत सोऱो विकपा खातीर परवाने मागल्ल्यान ते संबंदी बसकेंत चर्चा करून अशे परवाने दिवप समा न्हय अशें नगरसेवकांनी सांगलें. मसंडभुयेंची दुरुस्ती, रस्त्यात कुत्री आनी गोरवां, उक्ती गटारां, घाणयारें उदक, गटारांत सोडटात ते घाणयारें उदक हाचेर बसकेंत चर्चा जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
