दिवचले हायर सेकंडरींत इकरा विद्यार्थिनींक जालो स्वास घेवपाक त्रास
भांगरभूंय | प्रतिनिधी
चवगां अजून हाॅस्पिटलांत घेतात उपचार
दिवलच, प्रतिनिधी : दिवचलचे शांतादुर्गा उच्च माध्यमीक विद्यालयांत दनपरां बारा विद्यार्थ्यांक स्वास घेवपाक त्रास जाल्ल्यान तांकां हाॅस्पिटलांत व्हेले. णव जाणांक म्हापश्यां फुडल्या उपचारां खातीर धाडल्यात. हायर सेकंडरीच्या वेवस्थापनान पुलिसांक खबर दितकच पुलिसांनी घडणूक थळाचेर वचून चवकशी आनी तपास केलो. कोणे तरी वर्गा भायल्यान पेपर स्प्रे मारलो. आतां सीसीटीव्ही फुटेजी वयल्यान तपास चालू आसा.
हो स्प्रे आशिल्लो काय आनीक कितें ताचोय तपास चालू आसा. बारा मदल्या एकल्याक घरा धाडला. तर दोगांचेर दिवचले उपचार चालू आसात. बाकींची म्हापश्यां उपचार घेतात.
मजगतीं, पेपर स्प्रे प्रकरणांत दिवचल पुलिसांनी 4 विद्यार्थ्यांची वळख पटयल्या. सगळे नेण्टे (पिरायेन १८ वर्सां सकयल) आशिल्ल्यान पुलिसांक कसलीच कारवाय करपाक मेळना. आतां ताचें कितें तें वेवस्थापनान पळोवचें, अशें पत्र पुलिसांनी शाळा वेवस्थापनाक बरयलां, अशी म्हायती एका पालकान दिली.
ह्या विद्यार्थ्यांनी जनेलांतल्यान पेपर स्प्रे (मिरयां, मसाल्याचो स्प्रे) मारिल्ल्यान हो सगलो प्रकार घडलो, अशेंय तांणी सांगलें. तीन दिसां पयलीं असोच स्प्रे मारिल्लो. मात हें प्रकरण फक्त विद्यार्थी, शिक्षक आनी पालकां पुरतेंच मर्यादीत उरलें. आतां थळावे आमदार डॉ. चंद्रकांत शेट्ये हांणी ह्या प्रकाराची चवकशी करची, अशें वेवस्थापन आनी पुलिकांक सांगलां.
पेपर स्प्रेची घडणूक घडटकच पालकांचेर आकांत आयलो. कांय जाणांनी विद्यालया कडेन धांव घेतली. विद्यार्थिनींक हाॅस्पिटलांत व्हरपाक अॅम्ब्युलन्सूय आयल्यो. आमदार डाॅ. शेट्ये हांणी हाॅस्पिटलांत वचून विद्यार्थिनींची विचारपूस केली. हाॅस्पिटलाच्या दोतोरांनी धांवपळ करून सगल्यांच गरजेची वैजकी सुविधा मेळोवन दिली.
पेपर स्प्रे नेमको कोणे मारलो? तो मारिल्ल्याची घडणूक खरी जाल्यार, त्या विद्यार्थ्यां वांगडा आनीक कोण आशिल्ले? स्प्रे मारपाचें नेमकें कारण कितें? तो चलयांचेरुच कित्याक मारलो? हे विद्यार्थी शाळेचे काय भायले, ह्या प्रस्नांची वेवस्थापन आनी पुलिसांनी चवकशी करची, अशी मागणी विद्यार्थिनींच्या पालकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
