भांगरभूंय | प्रतिनिधी
दुबावीत फैझल सय्यदाचेर गोंयांत गुन्यांव
म्हापशें: दिवचल पुलिसांनी गुन्यांव फांट्याच्या आदारान भांगराची सरपळी झोमून व्हरपाच्या प्रकरणांतलो धाडशी आनी खांपो गुन्यांवकार दुबावीत फैझल शहाजन सय्यद (24, नेसाय, कुडटरी) हाका अटक केली. दुबाविताक अटक केल्ल्यान उत्तर गोंयांतले भांगराची सरपळी झोमून व्हरपाचे पांच ते स प्रकार वाटावपाक पुलिसांक येस आयलें अशी म्हायती अधिक्षक निधीन वाल्सन हांणी दिली.
मंगळारा पर्वरे मुख्यालयांत आयोजीत केल्ले पत्रकार परिशदेंत दिवचल पुलीस पंगड हाजीर आशिल्लो.
हालींच तोरशें-पेडणें, माडेल-थिवी आनी मुळगांव-दिवचले ह्या वाठारांनी मंगळसुत्र झोमून व्हरपाचे प्रकार घडिल्ले. ते प्रमाण उत्तर गोंय पुलीस गुन्यांव फांट्याच्या पुलिसांचे मजतीन तपास काम करतात. ह्या वेळार न्हावेली-सुर्ला हांगा दुबावीत आरोपी मोटारसायकलीन भोंवत आशिल्ल्याची म्हायती दिवचल पुलिसांक मेळिल्ली. ते प्रमाण पुलीस पंगडान सांपळो रचलो. रस्त्या वयल्या कांय बायलांच्या गळ्यांतली सरपळी झोमून व्हरपाच्या यत्नांत आसतनाच पुलिसांनी दुबावीत आरोपी फैझल सय्यद हाका धरलो जाल्यार ताचो दुचाकी वांगडी पुलिसांच्या हाताक लागचे पयलीं पल्सर मोटारसायकली वयल्यान पळ काडलो.
हालींच मुळगांवां एके बायलेच्या गळ्यांतले 55 हजारांचें मंगळसुत्र झोमून व्हेल्लें. हाची चवकशी पुलीस करतात. दुबावीत आरोपीन हालींच्या काळांत पणजी, कोलवाळे, पेडण्यां आनी पर्वरे भांगराच्यो सरपळी झोमून व्हेल्यात. जाल्यार दुबावीत आरोपी पेडणें आनी कळंगूटे पांच ते स भांगराच्यो सरपळी झोमून व्हरपाचे तयारींत आशिल्लो अशें चवकशेंतल्यान उक्तडार आयिल्ल्याचें अधिक्षक निधीन वाल्सन हांणी सांगलें.
दुबवीत आरोपी फैझल हाचेर दक्षीण गोंयांत, मडगांवां दोन, मायणा कुडटरींत चार, वेर्ण्यां दोन आनी सांगें, कुडचडें आनी फातोड्ड्यां दरेकी एक अशे वट्ट 11 गुन्यांव नोंद आसून तातूंतल्या 9 गुन्यांव भांगराच्यो सरपळी झोमून व्हरपाचें जाल्यार एक ड्रग्स आनी जबरी चोरी करपाचो आस्पाव आसा. दुबावीत आरोपी पिरायेच्या 19 व्या वर्सां सावन गुन्यांवकारी कारवायांनी आशिल्ल्याचें चवकशेंतल्यान दिसून आयलें.
ही कामगिरी पुलीस उपअधिक्षक सागर एकोस्कार, निरिक्षक राहूल नायक, उपनिरिक्षक प्रसाद पाळणी, सहाय्यक उपनिरिक्षक लक्ष्मण घाडी, गिरीश पाडलोस्कार, हवालदार हसन पटेल, कॉन्स्टेबल अनील देसाय, गौरव वायंगणकार, विशाल परब, शैलेश गोवेकार, प्रझल वेलींगकार आनी पंगडान केली.
दुबावीत फैझल हो बेळगांव आनी वाठारांतल्या गुन्यांवकारी प्रवृत्तीच्या लोकां कडेन वळख करप. तांकां गोंयांत हाडून तोडकी मोडकी कोंकणी शिकोवन उपरांत तांचे वतीन भांगराच्यो सरपळी झोमून व्हरपाच्यो चोरी करतालो. दुबाविता सयत ह्या प्रकरणांत आनीक तीन ते चार वांगडी आसात. तांचो सोद सुरू आसा. तशेंच चोरयेचेा मुद्देमाल दुबाविता कडल्यान जप्त करपाचेंय तपासकाम सुरू आसा अशी म्हायती अधिक्षक निधीन वाल्सन हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
