दाबोळे विमानतळ विभागांत पडपी एक घर मोडलें
भांगरभूंय | प्रतिनिधी
वास्को ः दाबोळी विमानतळाच्या ‘फनल झोनां’त पडपी दाबोळीचें एक घर चिखली पंचायतीन कारवाय करून मातये भरवण केले. मुरगांव गटविकास कार्यालयान नोटीस जारी केले उपरांत लोकांनी न्यायालयांत वचून स्थगिती मेळयिल्ली. उपरांत थंयच्या धा घरमालकांक तात्पुरती सुटका मेळ्ळी. फाटलीं 15 वर्सां आमी ह्या जाग्यार रावतात. फाल्यां आमचीं घरां काडलीं जाल्यार आमी खंय वचपाचें असो प्रस्न लोकांनी केला. ह्या प्रकरणांत सरकारान योग्य मार्ग आपणावचो अशी मागणी तांणी केल्या.
ह्या फनल झोनांत बांदिल्ल्या बांदकामांचें सर्वेक्षण करून थळाव्या प्रशासनान ती मोडपाची म्हायती दिली. ते प्रमाण दोन वर्सां आदीं मुरगांव गटविकास कार्यालयान संबंदीतांक तीं बांदकामां मोडपा संबंदी नोटीस दिल्ली. पूण इकरा मदल्या धा जाणांनी न्यायालयांतल्यान नोटिशीचेर स्थगिती मेळयल्या. सध्या हें प्रकरण न्यायालयांत प्रलंबीत आसा. स्थगिती मेळोवपाचो यत्न करूंक नाशिल्ल्या घरमालकाचे घर मोडून उडोवपाचे निर्देश कार्यालयान चिखली पंचायतीक दिल्ले. ते प्रमाण जेसीबीच्या आदारान चिखलीचे सचीव आनी हेर अधिकाऱ्यांच्या हजेरीत घर मोडून उडयलें. हाचे पयलीं घरांतले सगलें सामान हालयले. हें घर मोडून उडयल्ल्यान हेरां मदीं भंय पातळ्ळा.
आमी सगळे सोपस्कार करून घरां आनी जमीन विकत घेतिल्ली. आमकां घर आनी जमीन विकपी मनशान फनल झोना विशीं कांयच सांगलें ना, तशेंच नौदलांतल्यान आमकां कसलीच म्हायती दिवंक नाशिल्ली. देखून आमकां कांयच खबर नाशिल्ली. ते बाबतींत नौदलान थंय एक फलक उबारपाची गरज आशिल्ली. ताका लागून आमी जतनाय घेता आशिल्ले अशें घरमालकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
