भांगरभूंय | प्रतिनिधी
फोंडें : किर्लपाळ-दाबाळची सरपंच रुक्मिणी गांवकार हांचे आड दाखल जाल्लो अविश्वास थाराव बुधवारा 5 आड 4 मतांनी पुलीस बंदोबस्तांत संमत जालो. कांय दिसां पयलीं वट्ट 6 पंच वांगड्यांनी थाराव दाखल केल्लो. रोखडीच नव्या सरपंचाची निवड जातली.
रुक्मिणी गांवकार हांकांच सरपंच पदार दवरपाचो यत्न मतदाना आदींय केल्लो. पूण 5 पंच वांगडी एकसंघ राविल्ल्यान विरुद्ध गटाक येस येवंक ना. हे बसकेक सगळे 9 पंच हाजीर आशिल्ले. ह्या वेळार धारबांदोडेंच्या गट विकास कार्यालयाचें अधिकारी देवू माईणकार आनी पंचायत सचीव हांणी म्हत्वाचे सोपस्कार पुराय केले.
पंच वांगडी रमाकांत गांवकार हांणी पंचायतींत वर्सभर लोकांचीं कामां आडखळून पडिल्लीं. सरपंच म्हयन्यांतल्यान एकदांच बसकेक हाजीर रावताली. उरिल्ले दीस सरपंचाचो पूत पंचायतीचो वेव्हार सांबाळटालो, असो गंभीर आरोप केले. लोकांच्यो समस्या सोडोवपा खातीर यत्न जायनाशिल्ले. ताका लागून बिनविरोध सरपंच म्हणून निवड केल्ले रुक्मिणी गांवकार हांचे आड अविश्वास थाराव दाखल केल्ल्याचेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
