भांगरभूंय | प्रतिनिधी
शॅक आनी तात्पुरतें बांदकाम परवानो शुल्क देंवलें
पणजी, प्रतिनिधी: दर्यादेग वाठारांनी बांदकामां खातीर परवानगी मागपी अर्जांचेर पर्यावरण खात्यान छाननी शुल्क वाडयलां. ते प्रमाण उक्तें हॉल वा लॉन बांदपाची परवानगी घेवपाचो शुल्क एक लाख रुपया वयल्यान पांच लाख रुपया मेरेन वाडयलां. मात शॅक वा हेर तात्पुरत्या बांदकामांचें परवानो शुल्क दर चौखण मिटराक १००० रुपया वयल्यान ७०० रुपया मेरेन उणें केलां.
हे विशीं हालींच काडिल्ले अधिसुचवणे प्रमाण सीआरझेड मळार आदीं पसून अस्तित्वांत आशिल्ल्या घरांच्या वा अन्य बांदकामाच्या दुरुस्तीचें शुल्क १५ हजार वयल्यान २५ हजार रुपया केलां. तशेंच अशीं घरां परत बांदपाचें शुल्क १५ वयल्यान २५ हजार रुपया केलां. नवीं घरां बांदपा खातीरचो परवानो ५० वयल्यान ६० हजार रुपया केला.
बीच वेडींग, इव्हेंटा खातीरचें शुल्क १ लाख रुपया आशिल्लें ते तशेंच दवरलां. नवें हॉटेल वा रेस्टॉरंट बांदपा खातीर १ लाख २५ हजार रुपया प्रती चौरस मीटर, फ्लोटिंग जेटी खातीर १ लाख २५ हजार, कॉंक्रीट जेटी खातीर २ लाख ५० हजार, वेवसाय करपाक बांदपी राखणे वणटी खातीर ७५ हजार, सरयेच्या आड्या खातीर २५ हजार आनी जेटी, बोट दुरुस्ती खातीर ६० हजार रुपया शुल्क भरचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
