दर्जेदार शिक्षकां खातीर भरती नेमांत जातलो बदल

भांगरभूंय | प्रतिनिधी

-आयआयटी खातीर बेगिनूच जागो उपलब्ध करतले

पणजी : विद्यार्थ्यांक दर्जेदार शिक्षण मेळपा खातीर दर्जेदार शिक्षकांची गरज आसा. शिक्षण क्षेत्रांत दर्जेदार शिक्षक येवपा खातीर शिक्षक भरती नेमांत बदल करपाची प्रक्रिया सुरू आसा. आयआयटी कॅम्पसा खातीर 10 लाख चौखण मिटर जाग्याची गरज आसा. आयआयटी खातीर बेगिनूच जागो उपलब्ध करतले, अशें मुख्यमंत्री डॉ. प्रमोद सावंत हांणी सांगलें.

सभाघरांत सोमारा शिक्षण, तंत्रीक शिक्षण, उच्च शिक्षण ह्या विशयांच्या मागण्यांचेर चर्चा जाली. चर्चा जावन मागण्यांक सभाघरान मान्यताय दिली. चर्चेक जाप दितना मुख्यमंत्र्यांनी ही म्हायती दिली.

अनुदानीत संस्थांक देणग्यो घेवपाक मेळच्यो ना

अनुदानीत शिक्षण संस्थांंचो सगळो खर्च सरकार करता. इमारत बांदकाम तशेंच देखभाली खातीर सरकार पयशे दिता. तरी लेगीत कांय संस्था पालकां कडल्यान देणग्यो घेतात. हे विशीं कोणूच कागाळ दिवपाक फुडें येना. अनुदानीत संस्थांक देणग्यो घेवपाक मेळच्यो ना, अशें मुख्यमंत्री डॉ. प्रमोद सावंत हांणी स्पश्ट केलां.

90 टक्के सरकारी शाळांची दुरुस्ती

सरकारी शाळांनी मुळाव्यो सुविधा उपलब्ध केल्यो जाल्यार विद्यार्थ्यांचो आंकडो वाडप शक्य आसा. कारापूरच्या सरकारी शाळेंत 300 विद्यार्थी आसात. ही देशांतली पयली हरीत शाळा. सरकारान 90 टक्के सरकारी शाळांची दुरुस्ती केल्या. बालरथ बशींची वेवस्था विद्यालयीन विद्यार्थ्यां खातीर केल्ली. बालरथ बशी मुळाव्या शाळेंतल्या विद्यार्थ्यांक व्हरपाक लागल्यो. हाचो फटको सरकारी शाळांक बसलो, अशें मुख्यमंत्र्यांनी सांगलें.

एक शिक्षकी शाळांक आनीक शिक्षक मेळटले. अप्रेेंटीस येवजणे खाला शिक्षकांची भरती जाल्या. ह्या

शिक्षकांची एक शिक्षकी शाळांनी वेवस्था जातली. अनुदानीत शाळांतले कांय शिक्षक हेर वेवसाय करतात. शिक्षणाचेर पुराय लक्ष दिवपी शिक्षकांची गरज आसा. शिक्षक भरतीच्या नेमांत दुरुस्ती जातली.

राष्ट्रीय शिक्षण धोरणाची कार्यवाही

राष्ट्रीय शिक्षण धोरणाची कार्यवाही करपी गोंय पयलें राज्य. गोंय राज्य शिक्षण फावंडेशनाची स्थापणूक जाल्या. फावंडेशना खाला तरेकवार येवजण्यो सुरू जाल्यात. शिक्षणा विशीं चित्रफिती तयार करपा खातीर दिश्टावो उपक्रम सुरू जाला. आतां मेरेन 27,700 चित्रफिती तयार जाल्यात. 30 टक्के चित्रफिती कोंकणीतल्यान आसा.

पदवीधरांक जीपीएससी खबर ना

जीपीएससी म्हणल्यार गोंय लोकसेवा आयोग हे बर्‍याच पदवीधरांक खबर ना. केंद्रीय लोकसेवा आयोग, रेल्वे भरती हे परिक्षांक बसपी गोंयच्या विद्यार्थ्यांचो आंकडो उणो आसा. गोंय लोकसेवा आयोग परिक्षे खातीर प्रशिक्षण वर्ग सुरू जातले. अर्थीक नदरेन मागास विद्यार्थ्यां खातीर शुल्कांत सवलत दिवपाची तयारी आसा.

बारावी विज्ञान फांट्यांत विद्यार्थी गणित घेवपाक पळयनात. गणित विशय नाशिल्यान तांकां अभियांत्रिकी फांट्यांत प्रवेश मेळना. गणिताक लागून अभियांत्रिकीच्यो सुवातो रित्यो उरतात. गणिता विशीं आवड निर्माण करपाची गरज आसा, अशें मुख्यमंत्री डॉ. प्रमोद सावंत हांणी सांगलें.

तीन म्हाविद्यालयांच्या इमारतीचो बुन्यादी फातर

अंदूं वास्तुशिल्पकला, फायन आर्टस आनी फार्मसी म्हाविद्यालाच्या नव्या इमारती खातीर बुन्यादी फातर बसयतले. एम. आर्क. तशेंच फायन आर्टस मदलो पदव्युत्तर अभ्यासक्रम सुरू जाला. आयटीआय पुराय करून तंत्रनिकेतनांत (पॉलिटेक्नीक) प्रवेशा खातीरच्यो सुवातो वाडयल्यात, अशें मुख्यमंत्र्यांनी सांगलें.