भांगरभूंय | प्रतिनिधी
म्हापशें: थिवी-रेवोड्यां चिऱ्या खणीच्या खोल फोंडांतल्या उदकांत बडून राज लोटलीकार ह्या 21 वर्सां पिरायेच्या तरणाट्याक मरण आयलें. राज हो मडगांवच्या एका नामनेच्या उद्देजकाचो पूत आशिल्लो. उजो पालोवपी दळाच्या जवानांनी थळाव्यांचे मजतीन ताची कूड उदका भायर काडली.
घडणुकेची म्हायती मेळटकूच पुलीस आनी म्हापशेंचे उजो पालोवपी दळाचे जवान घडणूक थळार दाखल जाले. जवानांनी राज हाची कूड उदकांतल्यान भायर काडपाचो खर यत्न केलो, पूण फोंड बरोच खोल आशिल्ल्यान जवानांक ह्या कामांत आडमेळीं येवपाक लागल्यो. उपरांत सुरू केल्ल्या यत्नांत तांकां येस आयलें आनी कूड भायर काडली.
हे विशींची पुलिसांनी दिल्ले म्हायती प्रमाण 7 तरणाट्यांचो पंगड तिलारी कानला कुशीक पिकनिके खातीर आयिल्लो. ह्या पंगडांतले कांय जाण चिऱ्या खणीच्या फोंडांतल्या उदकांत पेंवपा खातीर देंवले. फाेंड बरोच खोल आशिल्ल्यान आनी उदकाचो अदमास येवंक नाशिल्ल्यान राज लोटलीकार हो तरणाटो उदकांत बुडलो. घडणुकेची म्हायती मेळटकूच कोलवाळ पुलीस आनी उजो पालोवपी दळाच्या जवानांनी घडणूक थळार धांव घेवन सोदकार्य सुरू केलें.
मजगतीं, 9 जुलय दिसा नेत्रावळी सांग्यार मैनापी घसाशार पावसांतल्या पर्यटना खातीर गेल्ल्या दोगांक बुडून मरण आयिल्लें. उपरांत कुवेली, कांसावली हांगासरल्या चिऱ्या खणीच्या फोंडांत एक 16 वर्सा पिरायेच्या तरणाट्याक बुडून मरण आयिल्लें. घसघशांचेर बुडून मरण येवपाचे घडणुकेक लागून कांय दीस घसघशांचेर वचपाक बंदीय घाल्ली. तशेंच खणीच्या फोंडांतूय पेंवपा खातीर देंवचें न्हय अशी सुचोवणी जिल्होधिकाऱ्यानी दिल्ली. उपरांत तरणाट्यांच्या उतिउत्साहाक लागून बुडपाच्यो घडणुको घडत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
