भांगरभूंय | प्रतिनिधी
म्हापशें: पायनीवाडो, थिये साद्या कारणा वयल्यान विजय दाशमी (मूळ उत्तर प्रदेश) हाका खर मारपेट केल्ल्या प्रकरणांत कोलवाळ पुलिसांनी चौगांक अटक केली. अटक केल्ल्यां मदीं दुबावीत कमल सिंग काजले (20), लक्ष्मण काजले (22), राहूल काजले (22) आनी सुनील ठाकरे (20) सगले रावपी उत्तर प्रदेश हांचो आस्पाव आसा.
जखमी आनी दुबावीत आरोपी पायनीवाडो, थिये फुटबॉल मैदाना कुशीक रावतात. हो प्रकार मंगळारा रातीं 9.30 वरांच्या सुमाराक घडलो. विजय दाशमी हाची घरकान्न घरा कुशीच्यान वताली. तेन्ना दुबावितांनी तिचे कडेन अश्लील हावभाव केले.
हाची जाप विचारपा खातीर जखमी दाशमी गेलो तेन्ना ताका वयल्या चौगांय दुबावितांनी दांड्यांनी, खोंटींनी मारपेट केली. ह्या मारपेटींत जखमीचे तकलेक खर जखम जाल्या. जखमी विजय हाचो बापोल भाव धीरज दाशमी हाणें कोलवाळ पुलिशेंत कागाळ दाखल केल्या.
ते प्रमाण दुबावितां आड भा.दं.संच्या 324, 326 आनी 34 कलमा खाला गुन्यांव दाखल केला. बुधवारा सांजवेळा पुलिसांनी दुबावितांक अटक केली. फुडलो तपास पुलीस उपनिरिक्षक भरत खरत करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
