भांगरभूंय | प्रतिनिधी
पालिकेक पडटलो मोटो अर्थीक खार; ‘भांगरभूंय’न उजवाडायिल्ली खबर
म्हापशें: पालिकेचो बांदकामाक परवानो घेवंक नाशिल्ल्या चारूय प्रकल्पांक परवान्यांची प्रक्रिया ‘भांगरभूंय’न उजवाडा हाडिल्ले खबरे उपरांत म्हापशें पालिका अधिकाऱ्यांनी आतां धडपड सुरू केल्या. पूण हे प्रक्रिये खातीर आतां पालिकेक मोटो अर्थीक खार पडटलो.
म्हापशें पालिकेंत आमी करूं ती पुर्वदिशा ही वृत्ती बळावता. पालिकेच्या प्रकल्पांक बांदकाम परवानोच ना अशा माथाळ्या खाला ‘भांगरभूंय’न खबर उजवाडा हाडिल्ली. हे खबरेक लागून पालिका मंडळ आनी अधिकाऱ्यां मदीं एकूच बोवाळ जालो. हें प्रकरण आंगार येवचे पयलींच आतां बांदकाम परवानो मेळोवपा खातीर अधिकाऱ्यांची धडपड सुरू जाल्या.
पालिकेची प्रशासकी इमारत प्रकल्प, पोरण्या मामलेदार कचेरेचे सुवातेंत उबारतल्या नियोजीत वेपारी प्रकल्प, नुस्तें, मांस मार्केट प्रकल्पांतलें भोवउद्देशी सभाघर ह्या प्रकल्पांचो बांदकाम परवानो पालिकेन कंत्राटदाराक दिवपाची तयारी आतां पालिका मंडळान चलयल्या. पूण फाटलीं 10 ते 12 वर्सां बांदकाम रखडिल्ल्या बाजारपेठेंतल्या चण्यांच्या खोरणांच्या वाठारांतलो ‘ए’ आनी ‘सी’ ब्लॉक इमारती खातीर बांदकाम परवानो दिवप पालिकेक अडचणीचें थारतलें.
ह्या प्रकल्पांक आतां बांदकाम परवानो दिवपाचो आसल्यार उत्तर गोंय नियोजन विकास प्राधिकरणा कडेन परतून प्रकल्पाचो आराखडो सादर करचो पडटलो. ह्या आराखड्या खातीर एनजीपीडीएंत मोटें शुल्क भरचें पडटलें. ते खातीर पालिकेक हे बांदकाम परवाने मेळोवपा खातीर व्हड प्रमाणांत भौशीक मालमत्ता आशिल्ल्या पालिका निधीचो खर्च करचो पडटलो.
नगरपालिका कायद्याचें उल्लंघन करून ह्या प्रकल्पांक बांदकाम परवानो दिनासतना पालिका बेकायदो काम करपाक कंत्राटदाराक उत्तेजन दिवपी पालिका मंडळ, पालिका अधिकारी तशेंच जीसुडाचे अधिकारी सद्या दुबावाच्या सांवटा खाला सांपडल्यांत. हो एकंदर प्रकार उक्तडार आयिल्ल्यान सद्याचे आनी आदले नगरसेवक आनी अधिकारी आतां एकामेकांक बोट दाखोवंक लागल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
