भांगरभूंय | प्रतिनिधी
रमेश तवडकार: धारगें-सांकोड्ड्यां घराची केली पळोवणी
फोंडें: धारगें-सांकोड्ड्यां तृप्ती तुळशीदास गांवकार हांच्या घराची वणत कोसळिल्ल्याची म्हायती मेळ्ळे उपरांत सभापती रमेश तवडकार हांणी काल (आयतारा) थळावे आमदार गणेश गांवकार हांचे सयत घराची पळोवणी केली. ह्या वेळार सांवड्डें मतदारसंघांतले विवीध पंचायतींचे सरपंच, पंच आनी ग्रामस्थ व्हड संख्येन हाजीर आशिल्ले. सभापती रमेश तवडकार हांणी श्रम धाम येवजणेंतल्यान तृप्ती गांवकार हांकां घर उबारून दिवपाचें आस्वासन दिलें.
सभापती रमेश तवडकार हांणी आयतारा सकाळीं तृप्ती गांवकार हांच्या घराची पळोवणी केली. घराची वणत फाटल्या कांय दिसां सावन कोसळिल्ल्यान तृप्ती गांवकार हांचे मुखार मोटें संकश्ट उबें राविल्लें. म्हयन्या पयलीं तृप्ती गांवकार हांचो घरकार तुळशीदास गांवकार हांकां मरण आयिल्लें. तृप्ती गांवकार हांची दोन भुरगीं शिक्षण घेत आशिल्ल्यान घराची वणत उबारपा खातीर अर्थीक मजत करपाचें आव्हान तिणें केल्लें.
कोसळिल्ल्या वण्टीची पळोवणी केले उपरांत अदीक म्हायती दितना सभापती रमेश तवडकार हांणी तृप्ती गांवकार हांकां श्रम धाम येवजणेच्या माध्यमांतल्यान घर उबारून दितले. फुडल्या 15 दिसा उपरांत घर उबारपाच्या कामाक सुरवात जातली अशें तवडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
