तुयें वाठारांतल्या ‘विराणी’ शेतांचो इबाड
भांगरभूंय | प्रतिनिधी
पेडणें ः तुयें पंचायत वाठारांतल्या ‘विराणी’ शेतांचो इबाड जालो. अंदूं शेतकारांक खूब लुकसाण सोंसचें पडलें. 20 परस चड शेतकारांनी भात लायिल्लें, पूण शापोरा न्हंयेंक व्हड प्रमाणांत हुंवार आयिल्ल्यान न्हंयेचें राखणे वण्टीक पडिल्ल्या बुराकांतल्यान उदक भितर घुसलें आनी सप्तकभर तें थंयच उरिल्ल्यान भात कुसलें.
तिलारी धरणांतल्यान सोडिल्लें उदक शापोरा न्हंयेक मेळ्ळ्या उपरांत शापोरा न्हंयेंतल्यान व्हड प्रमाणांत उदक ‘विराणी’ शेतवडींत सांठले. धा ते बारा दीस उदक शेतांतच उरलें आनी पिकांचें व्हड प्रमाणांत लुकसाण जाले. परतून पेरणी करप मागीर भात रोवप शक्य नाशिल्ल्यान शेतकी खात्यान आनी सरकारान आमकां लुकसाण भरपाय दिवची अशी मागणी शेतकारांनी केल्या.
तुये पंचायत वाठारांतल्या शेतकारांनी कश्ट करुन शेती केल्ली. म्हारग बीं, सारें, नांगरप हांकां खूब खर्च जाता. शेतांचो इबाड जाल्ल्यान शेतकऱ्यांनी दुख्ख उक्तायलां. शेतकी अधिकाऱ्यांनी शेताची पळोवणी करून जांकां लुकसाण जालां तांकां भरपाय दिवची अशी मागणी थळावे पंच पेडणेकार, पंच उदय महाले आनी शेतकारांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
