तुमी तुमचें रेशन कार्ड ‘आधारा’क लींक केलें?

भांगरभूंय | प्रतिनिधी

30 सप्टेंबर 2023 निमाणी तारीख

पणजी : तुमी तुमचें रेशन कार्ड आधार कार्डाक लींक केलें? आजूनय करूंक ना जाल्यार तें बेगीन करचें. जर तुमी 30 सप्टेंबर मेरेन आपलीं रेशन कार्डा आधार कार्डांक लींक करूंक ना जाल्यार तीं निलंबीत जातलीं, अशी नागरी पुरवण खात्यान शिटकावणी दिल्या.
आजूनय 3,540 कुटुंबांनी रेशनकार्ड आधाराक लींक करूंक ना. राज्यांत 11,232 ‘एएआय’, 1,47,635 ‘एपीएल’ आनी 1,18199 ‘पीएचएच’ रेशनकार्डां आसात. तांतल्या ‘एएआय’ 96, ‘एपीएल’ 2,448 आनी ‘पीएचएच’च्या 996 कुटुंबांनी रेशनकार्डां आधारकार्डा कडेन लींक करूंक ना, अशें नागरी पुरवण मंत्री रवी नायक हांणी विधानसभेंत सांगलें.
विरोधी पक्ष फुडारी युरी आलेमाव हांणी विचारिल्ल्या प्रस्नाक जाप दितना ते उलयताले.
फाटल्या साडेचार वर्सांनी 10,232 जाणांनी रेशनकार्डां नागरी पुरवण खात्या कडेन ‘सरेंडर’ केल्यांत. जाल्यार ह्या काळांत 1,400 रेशनकार्डां खात्यान निलंबीत केल्यांत. फाटलीं पांच वर्सां अर्ज केल्ल्या सगळ्यांक रेशनकार्डां वाटल्यांत. स म्हयन्यांत आयिल्ले 116 अर्ज प्रलंबीत आसात, अशें जाप दितना फुडें मंत्री नायक हांणी म्हणलें.
दोन रेशनकार्डां वापरप्यांचेर नदर दवरपा खातीर नागरी पुरवण मंत्रालयान 19 मार्च 2020 दिसा पुराय देशांतली रेशनकार्डां आधारकार्डां वांगड लींक करपाचे आदेश जारी केल्ले. पूण तीन वर्सांनी खुबश्या जाणांनी ही प्रक्रिया करूंक नाशिल्ल्या मुजत वाड दितात. ताका लागून रेशनकार्ड आधाराक लींक करपाची निमाणी तारीख 30 सप्टेंबर अशी आसा.