भांगरभूंय | प्रतिनिधी
न्हंय देगेच्या गांवांक जतनाय घेवपाचो उलो
दिवचल: फाटल्या चार- पांच दिसां सावन उटंगाराचो पावस झडतूच आसा. तिळारी वाठारांतूय सेगीत पडपी पावसाक लागून उदका सांठो वेगान वाडपाक लागला. ताका लागून धरणांतलें उदक भायर सोडपाचो विचार आसा. ह्या उदकाक लागून लुकसाण जावचें न्हय देखून उपविभागीय अधिकारी, तिळारी शिर्श कामां उपविभाग क्र. 2 हांचे कडल्यान मार्गदर्शक सुचवण्यो दिल्यात.
तिळारी उपविभाग क्र. 2 हांणी प्रसिद्धी पत्रकांत म्हणलां की, 20 जुलया सावन तिळारी धरणाच्या पाणलोट वाठारांत पावसाक लागून धरणाचो उदका सांठो वेगान वाडटा. धरण वाठारांतल्या पाणलोट वाठारांतल्यान येवपी उदक नियंत्रीत तरेन कानाला वरवीं तिळारी न्हंयेंत सोडपाचें नियोजन आसा. ताका लागून 22 जुलयाक उरिल्लें उदक नियंत्रीत तरेन न्हंयेंत सोडटले. तशेंच सध्या धरणाच्या वाठारांत पावसाचें प्रमाण वाडिल्ल्यान धरणाच्या भायर उदकाच्या वाठारांत, व्हाळांनी सोडटलें. ते उदक मागीर न्हंयेंत येवन उदकाचीपातळी वाडपाची शक्यताय आसा.
न्हंयचे देगे वयल्या गांवकारांक शिटकावणी दिल्या. 22 जुलया सावन न्हंयांच्या पात्रांत उदकाचो प्रवाह वाडपाक शकता. देखून जतनाय घेवची आनी पात्रांत देंवपाचें धाडस करचें न्हय. लोकांच्या जिवीताक धोको निर्माण जावं येता. तशेंच, न्हंयेंतल्यान रातच्या वेळार यो- वच करचें न्हय. न्हंयेच्या पात्रांत कपडे धुंवपाक वचपी बायलांक, पात्रांत गोरवांक सोडपी शेतकारांनी शिटूक रावचें. न्हंयेचे देगेर रावपी आनी हेर सगळ्या गांवकारांनी खबरदारी घेवची, अशें उपविभागीय अधिकारी ग. दि. बुचडे हांणी म्हणलां
ह्या गांवांनी विशेश जतनाय घेवची
तिळारी धरणाचें उदक सोडिल्ल्यान ह्या न्हंयेचे देगेर आशिल्ल्या दोडामार्ग म्हालांतल्या कोनाळकट्टा, घोटगेवाडी, परमे, घोटगें, खानयाळे- आवाडें, मणेरी, कुडासे, साटेली -भेडशी गांवांनी जतनाय घेवची. जाल्यार गोंयच्या पेडणें म्हालांतल्या इब्रामपुर – हणखणें, चांदेल- हंसापूर, कासरवर्णें, वारखंड ह्या गांवांनी खबरदारी घेवची, अशें कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
