तिलारी धरण ओव्हरफ्लो
भांगरभूंय | प्रतिनिधी
उदक न्हंयेंत सोडपाक सुरवात
दोडामार्ग ः तिलारी धरण ओव्हरफ्लो जाल्ल्यान आयज सकाळीं 8.10 वरांचेर तिलारी धरणांतल्यान तिलारी न्हंयेंत उदक सोडपाक सुरवात जाल्या. नागरिकांनी भिवचें न्हय, सादूर रावचे अशें प्रशासनान स्पश्ट केलां.
शेनवारा धरणाची पातळी 106.70 मी. इतली भरिल्ल्यान उदक सोडपाक सुरवात जाल्या. हे संबंदी न्हंयेचे देगेर आशिल्ल्या सगल्या गांवांक सादूर रावपाची सुचोवणी दिल्या. काल शुक्रारा रातीं संबंदीत सगल्या गांवांनी सायरन वाजोवन शिटकावणी दिल्या. तेच प्रमाण जिल्लो आनी तालुका प्रशासन आनी जिल्लो आपत्कालीन वेवस्थापन लोकां कडेन सतत संपर्क दवरून फावो ती कार्यवाही करीत आसा.
तेरवन मेढे उन्नेयी बंदरांतल्यान फकत 98 घन मीटर उदक सोडलें. ताका लागून काल कांय प्रमाणांत गोंदळ सुरु आशिल्लो. हे संबंदी तथ्य सगल्या संबंदीत लोकांक कळयलां. देखून नागरिकांनी वावड्यांचेर विस्वास दवरचो न्हय आनी गरजे भायर भियेवंचें न्हय, अशें सिंधुदुर्ग पाटबंदारे प्रकल्पाचे कार्यकारी अभियंतो वि. बा. जाधव हांणी सांगलें. सध्या तिलारींतल्यान 4.556 दक्षलक्ष घन मीटर उदक सोडप सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
