भांगरभूंय | प्रतिनिधी
पणजी: गोंय पुलिसांच्या घुंवळे वखदां विरोधी पंगडान (एएनसी) मंगळारा फातांडेर 3 ते 6.15 वरां मजगतीं आसगांवच्या एका रॅस्टोरंण्टा कुशीक धाड घालून अभिनेतो सुशांत सिंग ड्रग्स प्रकरणांत अटक केल्लो खांपो तस्कर प्रसाद वाळकेक अटक केली. ताचे कडल्यान पंगडान 4 लाख 20 हजार रुपया मालाचो 30 ग्राम उच्च दर्जाजो गांजाे, 15 ग्राम एमडीएमए आनी 15 ग्राम अॅक्टसी पावडर जप्त केली.
पंगडान दिल्ले म्हायती प्रमाण मंगळारा मध्यान रातीं आसगांवां एका रॅस्टोरंण्ट वाठारांत एक मनीस घुंवळे वखदांची तस्करी करपा खातीर येतलो अशी म्हायती गुप्तहेरांनी पंगडाक दिल्ली. ते प्रमाण पुलीस अधिक्षक अक्षत कौशल आनी उपअधिक्षक नेर्लोन आल्बुकर्क हांंच्या मार्गदर्शना खाला पुलीस निरिक्षक सजींत पिल्ले हांंच्या फुडारपणा खाला महिला पुलीस उपनिरिक्षक प्रियंका गारुडी, कॉन्स्टेबल नीतेश मुळगांवकार, मंदार नायक, साईराज नायक, सुमीत मुठकेकार, संदेश वळवयकार, कुंदन पटेकार आनी हेर कर्मचाऱ्यांच्या पंगडान मंगळारा मध्यान रातीं सावन वयले सुवातेर सांपळो रचलो.
ते प्रमाण मंगळारा फांतोडेर 3 ते 6.15 वरां मजगतीं ते सुवातेर दुबावीत प्रसाद वाळके आयलो तेन्ना पंगडान ताका ताब्यांत घेवन ताची झडटी घेतली. त्या वेळार ताचे कडल्यान 4 लाख 20 हजार रुपया मोलाचो 30 ग्राम उच्च दर्जाचो गांजो, 15 ग्राम एमडीएमए आनी 15 ग्राम अॅक्टसी पावडर जप्त केली.
उपरांत पुलीस उपनिरिक्षक प्रवीण सिमेपुरुसकारान दुबावीत वाळके हाचे आड घुंवळे वखदां विरोधी कायद्याच्या कलम 20ए (ii)(बी) आनी 22(सी) खाला गुन्यांव दाखल करून अटक केली. दुबाविताक पुलीस कोठये खातीर बुधवारा सांजवेळा म्हापशेंच्या पयलो वर्ग न्यायालयांत हजर करतकूच न्या. निलिमा काणकोणकार हांणी ताका सात दिसांची पुलीस कोठी दिली.
खांपो तस्कर प्रसाद वाळके हाका 2018 वर्सा एएनसीन अटक केल्ली. ताचे कडल्यान एलएसडी, कोकेन, अॅक्टसी आनी गांजो जप्त केल्लो. उपरांत वाळके हाका अभिनेतो सुशांत सिंग ड्रग्स प्रकरणांत केंद्रीय नार्कोटीक ब्युरोन (एनसीबी) अटक केल्ली. त्या वेळार ताचे कडल्यान व्हड प्रमाणांत एलएसडी जप्त केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
