भांगरभूंय | प्रतिनिधी
भांगरभूंय । खबरां संस्था
आमची कूड घटमूट उरपा खातीर सदांच खुबश्या जिवनसत्वांची गरज आसा. पूण आयच्या भेसळ अन्नांतल्यान कुडीक जाय तीं जिवनसत्वां मेळनात. हाका लागून व्हिटॅमिनाचो उणाव जाता. हातूंत व्हिटॅमीन बी 12चो उणाव चड जाणवता. दोतोरांच्या म्हणण्या प्रमाण व्हिटॅमीन बी 12 चें काम म्हळ्यार तांबड्यो रगतपेशी तयार करप आनी मज्जासंस्था निरोगी दवरप. ताचो उणाव जाल्यार मेंदवाच्या कार्याचेरूय परिणाम जावं येता. अशे परिस्थितींत ह्या जिवनसत्वाच्या उणावाचेर आडनदर करची न्हय.
डॉक्टरांच्या मता प्रमाण, व्हिटॅमीन बी 12 च्या उणावाक लागून अशक्तपणां, न्युरोलॉजिकल समस्या, कांत हळदुवी पडप, वजन उणें जावप आनी काळजाची गती वाडप अश्यो समस्या निर्माण जावपाक शकतात. शरीरांत ह्या जिवनसत्त्वाचो सेगत उणाव आसल्यार तकली दुखप, खंयच्याच कामांत लक्ष लागना, तोंडाक फोड येवप अश्यो समस्या येतात.
प्रौढाक दिसाक 2.4 मायक्रोग्राम व्हिटॅमीन बी 12 ची गरज आसता. हें प्रमाण जीवनसत्व मेळना जाल्यार ताचो उणाव कुडींत दिसपाक सुरू जाता. हें सोदून काडपा खातीर तुमची व्हिटॅमीन बी 12 पातळी नेमान तपासात. तो उणो जालो जाल्यार आहाराचेर लक्ष दिवन दोतोराचो सल्लो घेवचो. दोतोर कांय वखदां घेवपाची सुचोवणी करूं येता वा व्हिटॅमीन बी 12 स्नायुंतल्यान इंजेक्शन दिवपाची सुचोवणी करूं येता. तशेंच तुमच्या आहारांत कांय खाणांचो आस्पाव करून ह्या जिवनसत्वाचो उणाव टाळूंक मेळटा.
कुडींत व्हिटॅमीन बी 12 चो उणाव पयस करपा खातीर बदाम, दूद, धंय, नुस्तें, तांतयां वा मांस सारकिल्लीं निरोगी खाणांचो तुमच्या आहारांत आस्पाव करून घेयात. ह्या खाणां भायर पांचवीं आनी पानां आशिल्ल्या भाजिपाल्याचो आहारांत आस्पाव करचो. तशेंच दिसभर फावो त्या प्रमाणांत उदक पिवचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
