भांगरभूंय | प्रतिनिधी
तरणाटेन मिरसांगेचो पिठो, पेपर स्प्रेचो केलो वापर
दुबावीत युसूफ शेखाक अटक; लोकांनी घेतली पळोवपाची भुमिका
म्हापशें: घाटेश्वरनगर खोर्ली हांगा 20 वर्सा पिरायेच्या म्हाविद्यालयीन तरणाटेन उबारून व्हरपाचो यत्न करतल्या दुबाविताचो प्रतिकार करून आनी मिरसांगेचो पिठो आनी पेपर स्प्रेचो मारो करून आपली सुटका केली. आपल्याक टाळत आशिल्ले तिडकींतल्यान दुबावितान हें कृत्य केलें. पूण ते तरणाटेन स्वताक वाटायलें. जाल्यार लोकांनी फक्त पळोवपाची भुमिका घेतली. ह्या प्रकरणांत म्हापशें पुलिसांनी लिंगीक अत्याचार आनी छळणूक केल्ल्याच्या आरोपा खाला दुबावीत युसूफ शेख (बार्देस) हाका अटक केल्या.
हो प्रकार शुक्रारा दनपारां 1.45 वरांच्या सुमाराक घाटेश्वरनगर हांगा घडलो. म्हापशें पुलिसांनी दुबावीत युसूय शेख हाका आठ वरां भितर रातच्या 10 वरांचेर अटक केली.
दुबावीत युसूफ हो पिडितेक मेळपा खातीर दनपारां आयिल्लो आनी तिका आपले बरोबर येवपाचो आग्रो करूंक लागलो. पिडितेन न्हयकार दितकूच तिका फरफटीत ओडून व्हरपाचो यत्न केलो. तिणें दुबाविताचो प्रतिकार करीत आपले बॅगेंत आशिल्लो मिरसांगेचो पिठो आनी पेपर स्प्रे ताच्या दोळ्यांत मारलो आनी पिडितेन ताका मारपेटूय केली. पिडितेची तिडक आनी प्रतिकार शक्त पळोवन दुबावितान घडणूक थळा वयल्यान आपली मोटार आनी मोबायल थंयच उडोवन पळ काडलो.
हो प्रकार मुखेल रस्त्यार घडलो. रस्त्या वयल्यान म्हाविद्यालयीन विद्यार्थी आनी खूबशे लोक चलत आनी वाहनांतल्यान वताले. पूण तांणी फक्त पळोवपाची भुमिका घेवन ह्या प्रकारा कडेन आडनदर केली. जाल्यार कांय जाणांनी हो प्रकार मोबायलाचेर व्हिडिओ शूट करपाक धन्यताय मानली. कोणेच पिडितेक दुबाविताच्या चपक्यांतल्यान वाटावपाचें मनीसपण दाखयलें ना. घडणुकेची म्हायती मेळटकूच म्हापशें पुलीस घडणूक थळार दाखल जाले आनी पिडितेक उपचारा खातीर जिल्हो हॉस्पिटलांत दाखल केली. थंय सावन तिका डिस्चार्ज दिले उपरांत पुलिसांनी तिची कागाळ नोंद करून घेतली.
मेळिल्ले म्हायती प्रमाण पिडितेच्या घरा शेजराच दुबावीत रावता. शेजारी आशिल्ल्यान तांची वळख जाल्ली आनी हेच वळखीचो फायदो घेवन ताणें पिडितेचेर अत्याचार करून तिची छळणूक चलयिल्ली.
कांय दिसां पयलीं पिडितेची दुचाकी नादुरुस्ती जाल्ली. ती दुचाकी घेवन एका शाेरुमांत गेल्ली. त्या वेळार दुबावितान तिका फोन करतकूच आपूण शोरुमांत आयिल्ल्याचें तिणें सांगलें. ते बरोबर दुबावीत थंय आयलो आनी हांगा दुचाकी दुरुस्ती खातीर चड पयशे खर्च करचे पडटले अशें सांगून पिडितेक घेवन दुसरे सुवातेर गेलो. थंय मॅकानिकान दुचाकीचे कांय पाटर्स नवे घालचें पडटले अशें सुचयलें.
पार्टस हाडपाचे निमित्त करून दुबावितान आपले मोटारींतल्यान पिडितेक एक निर्जनथळार व्हेलें आनी मोटारींतूच पिडितेचेर अत्याचार करून तिचो लिंगीक छळ केलो. हे घडणुके उपरांत दुबावितान पिडितेक परतून घरा हाडून सोडले. ह्या प्रकाराक लागून पिडितेच्या मनांत दुबाविता आड तिडक आनी दुस्वास निर्माण जालो.
ह्या अत्याचारा उपरांत पिडितेन दुबाविताचो क्रमांक आपल्या मोबायला वयल्यान ब्लॉक केलो. पूण दुबावितान पिडितेक कॉलेज थळार गांठून तिका आपूण शुक्रारा 28 वेर येवन मेळटलो अशें सांगलें. ते प्रमाण दुबावीत शुक्रारा दनपारां पिडितेची कॉलेज सुटपाच्या वेळार घडणूक थळार आयलो आनी तिका त्रास दिवंक लागलो आनी उपरांत हो सगलो प्रकार घडलो. पिडीत ही म्हाविद्यालयीन विद्यार्थिनी आसून ती उत्कृश्ट बॉक्सर आसा.
हे घडणुकेचो म्हापशेंच्या हिंदू संघटणांनी निशेध केलो. तशेंच संघटणेचे पदाधिकारी नारायण राटवड, संजय वालावलकार, हर्षद स्वार, प्रवीण च्यारी आनी हेरांनी पुलीस निरिक्षक सीताकांत नायक हांची भेट घेवन दुबाविताचेर खर कारवाय करपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
