‘तमनारां’तल्यान राज्याक मेळटली 1200 मेगावॅट वीज
भांगरभूंय | प्रतिनिधी
…तर प्रकल्प संकश्टांत : वीजमंत्री ढवळीकार
पणजी : खंडपीठाच्या आदेशा प्रमाण म्हादय वाठार व्याघ्र वाठार जाहीर जालो, जाल्यार तमनार प्रकल्पाच्यो आडखळी वाडपाची शक्यताय आसा. तमनार प्रकल्प संकश्टांत येवपाची शक्यताय आसा, अशें मत वीज मंत्री सुदीन ढवळीकार हांणी उक्तायलें. ह्या प्रकल्पांतल्यान गोंयाक 1200 मेगावॅट वीज मेळटली, अशेंय तांणी सांगलें.
सभाघरांत मंगळारा तमनार प्रकल्पाचेर चर्चा जाली. ह्या वेळार वीज मंत्री सुदीन ढवळीकार हांणी हें मत उक्तायलें. हो प्रकल्प रद्द करपाची मागणी विरोधी आमदारांनी केली.
व्याघ्र प्रकल्पाचो तमनार प्रकल्पाचेर कितें परिणाम जातलो, असो प्रस्न आमदार कार्लोस फरेरा हांणी केलो. व्याघ्र वाठार जाहीर करचो पडलो जाल्यार तमनार प्रकल्प संकश्टांत सापडप शक्य आसा. आत्तांच आपल्या कडेन हाची जाप ना, अशें श्री. ढवळीकार हांणी सांगलें.
तमनार प्रकल्पा खाला गोंय ते कर्नाटक मदीं 240 किलोमीटर विजेची लायन घालपाचो प्रस्ताव आसा. धारबांदोडें ते म्हापशें मेरेनची लायन 2023 मेरेन पुराय जातली. धारबांदोडें ते कर्नाटक मेरेनची लायन 2025 मेरेन पुराय जातली. ह्या प्रकल्पाचेर गोंय सरकाराचें नियंत्रण ना. राज्याक 1200 मेगावॉट वीज ह्या प्रकल्पांतल्यान मेळटली. ह्या प्रकल्पा खातीर 17 हजार झाडां मारचीं पडटलीं. धारबांदोडें सबस्टेशनाचेर 400 कोटी रूपया खर्च जातले. तमनार प्रकल्प पुराय जालो ना, जाल्यार सबस्टेशन तशेंच विजेच्या सरयांचो वापर राज्याक जातलो, अशें श्री. ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
