भांगरभूंय | प्रतिनिधी
म्हापशें: कासारवाडो, खोर्ली वाठारांत शुल्लक कारणा वयल्यान तकलेर फातर घालपाचो प्रकार घडलो. ह्या प्रकरणांत म्हापशें पुलिसांनी दुबावीत आरोपी अबू घोरल (30, रा. काणका बांद आनी मूळ अस्तंत बंगाल) हाका म्हापशें पुलिसांनी अटक केल्या. ही घडणूक सोमारा दनपारां 1.30 वरांचेर घडली.
दुबावीत आरोपी खोर्ली बायपास रस्त्या वयल्या कमलाबाई रॅस्टोरंण्टा कुशीक आशिल्ल्या शेतांत मुत्तालो. ह्या प्रकाराक कागाळदार उमेश नागवेंकार (कासारवाडो) हाणें आक्षेप घेतलो आनी दुबाविताक थंयच्यान वचपाक सांगलें. हाचे वयल्यान दुबावितान ताचे कडेन वाद घालो आनी नागवेंकार हांचे तकलेर फातर घालो. ह्या हल्ल्यांत कागाळदार गंभीर जखमी जालो.
घडणुके उपरांत दुबावीत आरोपीन पळ काडलो. कागाळदाराच्या पुतान आनी एका शेजाऱ्यान दुबाविताचो फाटलाग करून ताका काणका बांद हांगा धरून पुलिसांचे सुवादीन केलो.
म्हापशें पुलिसांनी रातीं उसरां भादंसंच्या 326 कलमा खाला गुन्यांव नोंद केलो आनी दुबाविताक अटक केली. दुबावीत आरोपीक म्हापशेंच्या न्यायालयान 14 दिसांची न्यायालयीन कोठी दिल्या. फुडलो तपास पुलीस हवालदार नंदू कुडासकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
