भांगरभूंय | प्रतिनिधी
ड्रायव्हराक काळजाचो आताक आयिल्ल्याचो दुबाव
फोंडें: ढवळे अंडरपास लागसारच्या जंक्शनाचेर ड्रायव्हराचें नियंत्रण गेल्ल्यान व्हाळाचे राखणे वण्टीक जिपीचो धपको बसलो. जीप चलयत आसतना अशोक इरगप्पा (50, सध्या रावपी पोरणें गोंय, मूळ कर्नाटक) ह्या ड्रायव्हराक काळजाचो आताक आयिल्ल्याचो दुबाव उक्तायत आसून एम्बुलन्सींतल्यान उपजिल्हो हॉस्पिटलांत दाखल करचे पयलींच ताका मरण आयलें. फोंडें पुलिसांनी अपघाताचो पंचनामो केला.
मेळिल्ले म्हायती प्रमाण जीए 07 टी 1143 क्रमांकाची जीप चलयत आसतना ड्रायव्हराचें नियंत्रण गेल्ल्यान जिपीचो धपको व्हाळाचे राखणे वण्टीक बसलो. सुदैवान जीप राखणे वण्टीचेर थिराविल्ल्यान ती व्हाळांत कोसळपा पसून वाटावली.
थळाव्या लोकांनी ड्रायव्हराक रोखडोच 108 एम्बुलन्सींतल्यान उपजिल्हो हॉस्पिटलांत दाखल केलो. पूण हॉस्पिटलांत पावचे पयलींच ताका मरण आयलें. जीप चलयत आसतना ड्रायव्हराक काळजाचो आताक आयिल्ल्याचो दुबाव उक्तायतात. मरणा उपरांतचे तपासणे उपरांत मरणाचें कारण स्पश्ट जातलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
