ड्रग्स प्रकरणांतल्यान डुडू आरोपमुक्त

भांगरभूंय | प्रतिनिधी

सात पुलिसांचेर आरोप निश्चीत करपाचे आदेश

भांगरभूंय । प्रतिनिधी

पणजीः ड्रग्स प्रकरणांत अटक केल्लो इस्रायली नागरीक डेव्हीड डिहम उर्फ डुडू हाका गोंय पुलिशेच्या घुंवळे वखदां विरोधी पंगडान (एएनसी) फटकिऱ्या गुन्यांवांत आडकयिल्ल्याचें सीबीआय तपारांत स्पश्ट जालां. ताका लागून उत्तर गोंय जिल्हो आनी सत्र न्यायालयान डुडूक आरोपांतल्यान मुक्त केला. ते भायर तेन्नाचो पुलीस अधिकारी नरेश म्हामल, सुनील  गुडलरा सयत सात पुलिसांचेर आरोप निश्चीत करपाचो आदेश दिला.

एएनसीन 21 फेब्रुवारी 2010 ह्या दिसा रातच्या 11.35 वरांच्या सुमाराक हणजूणेंच्या सेंट अँथनी कपेला लागसार धाड घालून डुडूक ताब्यांत घेतिल्लो. ते कारवायेंत ताचे कडल्यान 2 लाख 71 हजार 500 रुपया मोलाचें 4.4 ग्राम हिरोईन, 5.34 ग्राम कोकेन, 4.31 ग्राम लिक्वीड एलएसडी, 1.16 किलो चरस जप्त केल्ल्याचें एएनसीन नमूद केल्लें. ह्या प्रकरणांत एएनसीन घुंवळे वखदां विरोधी कायद्याचें कलम 20 (बी) (।।) (सी), 21 (ए) (बी) आनी 22 (सी) खाला गुन्यांव दाखल करून डुडूक अटक केल्ली. ते उपरांत न्यायालयांत डुडू आड आरोपपत्र लेगीत दाखल केल्लें.डुडूचे अटके उपरांत गोंयांत खवदळ पडिल्लो. तातूंत पुलीस अधिकाऱ्या सयत मंत्र्यांच्या सोयऱ्यांचेरूय आरोप जाल्ले. त्या वेळार डुडून आपले आड एएनसीन फटीचो गुन्यांव दाखल केल्लाचो दावो केल्लो. काँग्रेस फुडारी सुनील कवठणकार हाचे सयत तिगांनी ह्या प्रकरणांत उच्च न्यायालयांत जनहीत याचिका दाखल केल्ली. पुलीस आनी ड्रग्स तस्करां मदीं बरेंपण आशिल्ल्याचो दावो करून डुडू प्रकरण तपासा खातीर सीबीआयक दिवपाची तांणी मागणी केल्ली. ते प्रमाण उच्च न्यायालयान ह्या प्रकरणाची चवकशी सीबीआय कडेन दिवपाचे निर्देश दिल्ले. ते उपरांत सरकारान हें प्रकरण सीबीआय कडेन दिल्लें. ह्या प्रकरणांत डुडू वतीन अॅड. राजू पोवळेकार हांणी बाजू मांडली. तातूंत तपास अधिकाऱ्यांनी डुडूचेर फटीचो गुन्यांव दाखल केल्ल्याचो दावो केलो. ताचेर न्यायालयांत सुनावणी जाले उपरांत न्यायालयान डुडू हाका आरोपांतल्यान मुक्त केलो. तशेंच दुबावीत तेन्नाचे पुलीस उपअधिक्षक नरेश म्हामल, पुलीस उपनिरिक्षक सुनील गुडलर हांचे सयत इर्मिया गुरैया, समीर वारखंडकार, महादेव नायक, नागेश पार्सेकार, महाबळेश्वर सावंत ह्या सात पुलीस कर्मचाऱ्यां आड आरोप निश्चीत करपाचो आदेश जारी केला. अतिरिक्त सत्र न्यायाधीश शर्मिला पाटील हांणी हो आदेश दिला.

सीबीआयन केल्लो तपास

21 जून 2011 ह्या दिसा न्यायालयान डुडू आड आरोप निश्चीत करपाचो आदेश जारी केल्लो. ते उपरांत सीबीआयन प्रकरणाचो परतून तपास करून न्यायालयांत पुरवणी आरोपपत्र दाखल केलें. सीबीआयन न्यायदंडाधिकाऱ्या मुखार पंचांची साक्ष नोंद करून घेतली. त्या वेळार हे धाडी वेळार आपूण घडणूक थळाचेर हाजीर नाशिल्ल्याचो दावो करून पंचानी एएनसीची फट उक्ती केली. धाडींत वांटेकार आसिल्ल्या पुलिसांचो कॉल रिकॉर्ड आनी सुवातांची तपासणी करून डुडूच्या शेजाराक रावप्यांचे जबाब नोंद केले. तातूंत डुडूचे ड्रग्स प्रकरण आंगार आयिल्ल्याचें पुरवणी आरोपपत्रांत नमूद केलें. धाडींत वांटेकार आशिल्ल्या सगळ्या पुलीस अधिकाऱ्यां आड कारस्थान रचप, बनावट गुन्यांव दाखल करप, न्यायालयाची दिशाभूल करप हे सयत हेर आरोप करून सात पुलीस कर्मचाऱ्यांची नांवां पुरवणी आरोपपत्रांत नोंद केल्लीं.