भांगरभूंय | प्रतिनिधी
-गोंय पुलिसांचे अस्तंत विभागीय पुलीस समन्वय समितींत सादरीकरण
पणजी : गोंयांत ड्रग्ज येवपाचे जायते मार्ग आसून एलएसडी पेपर पुस्तकांत लिपोवन, जाल्यार कोकेन म्हाल वरवीं बोटींतल्यान हाडटात, अशें गोंय पुलिसांनी केल्ल्या सादरीकरणांतल्यान मुखार आयला. गोंय पुलिसांनी आयोजीत केल्ल्या अस्तंत विभागीय पुलीस समन्वय समितीचे बसकेंत हे सादरीकरण केल्ले.
सोमारा ऑनलायन पद्दतीन जाल्ले हे बसकेंत महाराष्ट्र, गुजरात, मध्य प्रदेश, राजस्थान आनी दमण पुलीस दळाचे अधिकारी हाजीर आशिल्ले. गोंय पुलिसांनी केल्ल्या सादरीकरणांत म्हणलां, एलएसडी पेपर पुस्तकांत घालून ते विमानाच्या लगेजांतल्यान हाडटात. एलएसडी क्रिस्टल लेगीत विमानाच्या लगेजांतल्यान हाडटात. उपरांत स्पिरीट घालून ते द्रव स्वरूपांत करतात. कोकेन दक्षीण अमेरिकेंतल्यान म्हाल व्हरपी बोटींतल्यान गोंयांत पावता.
हशीश (चरस) हे मुखेलपणान हिमाचल प्रदेश, नेपाळ आनी हेर उत्तर भारतीय राज्यांतल्यान रेल्वे वा बशींतल्यान हाडटात. गांजो झारझंड आनी ओडिशांतल्यान कर्नाटक, महाराष्ट्र आनी केरवळा वतीन हाडटात. गोंयांत ड्रग्जाची निर्मिती जायना. मात हे पर्यटन थळ आशिल्ल्यान नार्कोटीक आनी सायकोट्रोपीक ड्रग्ज विकतात, अशें सादरीकरणांत नमद केलां.
गोंयांत मुंबय, मनाली, बंगळुरू आनी ओडिशा तयार केल्ले ड्रग्ज विकतात. तशेंच जायते पर्यटक गोंयांत येतना ड्रग्स घेवन येतात. आंतरराष्ट्रीय नेटवर्कांत इस्रायल, नायजेरिया, युके, रशियांतल्या ड्रग्ज तस्कर गोंयांत डीएमटी, एमडीएमए आनी एलएसडी अशें ड्रग्ज तांच्या साहित्यांतल्यान हाडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
