भांगरभूंय | प्रतिनिधी
पणजी: येता त्या डिसेंबरा उपरांत गोंयांतल्या 2,35,346 वाहनांक 15 वर्सां पुराय जातलीं. सद्याचे स्थितींत 2,19,921 वाहनांचीं पिराय 15 वर्सां परस चड आसा. डिसेंबर मेरेन आनीक 15,425 वाहनांक 15 वर्सां पुराय जातलीं अशें येरादारी मंत्री मॉवीन गुदिन्हो हांणी विधानसभेंतल्या लेखी प्रस्नाचे जापेंतल्यान स्पश्ट केलें.
आमदार व्हेंझी व्हिएगश हांणी हे विशींचो प्रस्न विचारिल्लो. केंद्र सरकारान सरकारी खात्यांतल्या 15 वर्सां वयलीं वाहनां स्क्रॅप करपाचो निर्णय घेतले उपरांत गोंयांतल्या विवीध सरकारी खात्यांतलीं 516 वाहनां स्क्रॅप जाल्यांत. तशेंच कदंब म्हामंडळाच्या 16 बशींकूय डिसेंबर 2023 उपरांत 15 वर्सां पुराय जातलीं अशें मंत्री गुदिन्हो हांणी जापेंत म्हणलां.
मजगतीं, सरकारी खात्यांतलीं 15 वर्सां पुराय जाल्लीं वाहनां स्क्रॅप करपाचो निर्णय घेतले उपरांत प्रदुशण टाळपा खातीर 15 वर्सां पोरणीं जाल्लीं खाजगी वाहनांय स्क्रॅप करपाचो विचारूय केंद्रीय येरादारी मंत्रालय करीत आसा. तशें जायत जाल्यार गोंयांतलीं सुमार 2,35,346 वाहनां स्क्रॅप जातलीं.
वर्सभरांत 5,238 नव्या टॅक्सींची नोंदणी
2022 सावन आतां मेरेन येरादारी खात्या कडेन कितल्या टॅक्सींची नोंदणी जाल्या. तशेंच खात्यान कितल्या रेन्ट अ कार हांकां परवानगी दिल्या अशेय प्रस्न आमदार व्हेंझी व्हिएगश हांणी विचारिल्ले. ताचेर 2022 सावन आतां मेरेन खात्या कडेन 5,238 नव्या टॅक्सींची नोंदणी जाल्या आनी खात्यान 1,546 रेन्ट अ कार हांकां परवानगी दिल्या अशें येरादारी मंत्री मॉवीन गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
