भांगरभूंय | प्रतिनिधी
भांगरभूंय । प्रतिनिधी
मडगांवः खाजगी बस, कदंब बस वा टॅक्सी आसू. येरादारी सेवा दितात तांणी काळा वांगडा बदल स्विकारून आर्विल्ल्या तंत्रगिन्यानाचो वापर करपाक जाय. डिजिटल माध्यमांतल्यान सगल्यो सेवा एकाच प्लॅटफॉर्माचेर येवपाची गरज आसा. प्रगती करपी देशांत आनी राज्यांत नव्या तंत्रगिन्यानाचो वापर जाता. डिजिटल सिस्टम गेमचेंजर थारतली अशें मत येरादारी मंत्री माविन गुदिन्हो हांणी उक्तायलां. मडगांवां म्हजी बस येवजणेचें प्रयोगीक तत्वाचेर उक्तावण करतना ते उलयताले.
हे कार्यावळीक बांदकाम मंत्री नीलेश काब्राल, कदंब येरादारी म्हामंडळाचो अध्यक्ष आनी नावेलीचो आमदार उल्हास तुयेंकार आनी मडगांवचो आमदार दिगंबर कामक आनी म्हामंडळाचे अधिकारी हाजीर आशिल्ले. कोरोना म्हामारीच्या वेळार कदंब म्हामंडळान बरी सेवा दिली. म्हजी बस येवजण सध्या 25 बशीं पसून सुरू केल्या 187 बशींच्या खर्चाचें अदमासपत्रक तयार केलां. जशे खाजगी बसबाले येतले अशी तांकां मंजुरी दितले. म्हजी बस येवजणेची संकल्पना अडेज वर्सां आदीं तयार केल्ली मात अर्थीक खात्यान तिचे कडेन आडनदर केली अशें गुदिन्हो हाणे सांगलें.
खाजगी बश धनयांक इंधनाच्या अनुदान येवजणेतल्या कोवीड काळा सावन अनुदान मंजूर केला. अर्जांक मंजुरी मेळ्या उपरांत हेर बस धनयांनी आपले अर्ज सादर केले. मात तांणी जाय ती कागदपत्रां सादर करूंक नाशिल्ल्यान ह्या अर्जांक मंजुरी दिवप शक्य जालें ना. 15 वर्सा पुराय जाल्ल्यो पूण बरे स्थितींत आशिल्ल्यो बशी चलोवपाक दितले अशें गुदिन्हो हांणे ह्या वेळार जाहीर केलें. पोरण्या बशीचे सुवातेर नव्यो बशी घेवपाची गरज आसा. सरकार ते खातीर येवजण हाडपाचो यत्न करतलें अशें ताणे सांगलें.
राज्यांतली येरादारी वाडत आसा. बशी कमी पडपाक लागल्यात. ते खातीर म्हजी बस येवजण सुरू केल्या. हे बशींनी कंडक्टर कंदब म्हामंडळाचो आसतलो पूण बस आनी ड्रायव्हर खाजगी आसतलो. हे येवजणे खाला सुरू केल्ल्या बशींक 15 दिसांनी पयशे फारीक करतले. सध्या हे येवजणे खाला 66 बशींचीं नोंद जाल्या. सरकारान येवजणे खातीर साडेचार कोटी रुपये मंजूर केल्यात अशी म्हायती कदंब येरादारी म्हामंडळाचो अध्यक्ष उल्हास तुयेंकार हाणे दिली.
स म्हयन्यांत मोबायल अॅप
इंटेलिजन्स येरादारी वेवस्थापन पद्दतीन खाला फुडल्या स म्हयन्यांत कदंब वशींचो वेळ आनी बस खंय आसा ती सुवात मोबायलाचेर कळटली. अधिकाऱ्यांनी ही सेवा दिवपा खातीर यत्न करचे, बससेवा डिजिटल करपाचो आमचो यत्न आसा. खाजगी बशीचें परमीट सरकार घेवचो ना. तांणी आपलो वेवसाय कदंबच्या सहकार्यांतल्यान वाडोवचो आनी लोकांक बरी सेवा दिवची अशें माविन गुदिन्हो हांणी सांगलें.
टॅक्सीवाल्यांनी डिजिटल विचार करचो
डिजिटल प्लॅटफॉर्माचो आमकां फायदो ना. अॅपाचेर आयल्यार गिरायक मेळचें ना अशें टॅक्सीवाले मनांत घेवंन आसात. सध्याच्या तेपार डिजिटल प्लॅटफॉर्मार येवपाची सामकी गरज आसा. सरकारी अॅपाचेर तांकां येवपाचें नासल्यार तांणी स्वताचें अॅप तयार करचे. हातूंतल्यान येरादारी सुदारतली अशेंय गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
