ज्ञानाच्या भागीदारी खातीर कबलात

भांगरभूंय | प्रतिनिधी

भांगरभूंय । डीआयपी
पणजी : गोंय सरकारान राज्यांत पुराव्याचेर आदारीत धोरण तयार करप आनी ताचो प्रभाव हाचेर लक्ष केंद्रीत केलां. ते खातीर ज्ञान भागीदारी सुरू करपाक भारती इन्स्टिट्यूट ऑफ पब्लिक पॉलिसी, इंडियन स्कूल ऑफ बिझनेस हांचे वांगडा एक समजीकाय कबलात केल्या.
मुख्यमंत्री डॉ. प्रमोद सावंत हांचे उपस्थितीत सरकाराच्या नियोजन, सांख्यिकी आनी मूल्यांकन संचालनालयाचे संचालक विजय बी सक्सेना आनी भारती संस्थेची कार्यकारी संचालक प्रो. अश्विनी छत्रे हांणी कबलातीचेर सही केली. मुख्यमंत्र्यांचे सचीव अजित रॉय आनी भारती संस्थेचे संचालक डॉ आरुषी जैन हांचीय ह्या वेळार उपस्थिती आशिल्ली.
ज्ञान भागीदार म्हूण भारती संस्था ह्या कबलाती प्रमाण पुरावो आदारीत भौशीक धोरण, कार्यक्षमता वाड कार्यशाळा आनी लोक-केंद्रित प्रशासन-आदारीत उपक्रमां वरवीं समाजीक आनी आर्थिक उदरगतीच्या निर्देशकांत सुदारणा करपा खातीर राज्य सरकाराक मदत करतली.
ज्ञान भागीदारी कबलाती अंतर्गत क्षमतावाड उपायांचो एक भाग म्हूण भारती संस्था गोंय भौशीक प्रशासन आनी ग्रामीण विकास संस्था (GIPARD) हांच्या सहकार्यान राज्य सेवेच्या अधिकार्‍यां खातीर कार्यशाळा आयोजीत करतली. तातूंत धोरणात्मक समस्या, नवीन तंत्रज्ञान, शाश्वता, नेतृत्व आनी डिजिटल बदलांसयत हेर प्रस्नांचेर लक्ष केंद्रित करतले.
भारती इन्स्टिट्यूट गोंय सरकाराच्या माहिती तंत्रज्ञान खात्याच्या सहकार्यान गोवा ओपन डेटा पोर्टल विकसित करतली, जाचो फायदो नागरिकांक ओपन डेटा मेळपाक आनी संवाद सादपाक ‘वन-स्टॉप डेस्टिनेशन’ म्हूण जातलो.
राज्यांत जैव- उर्जा साठ्यांचो वापर, रान आदारीत समाजाचे सशक्तीकरण, राज्यांत खाजगी गुंतवणूकीक आकर्शित करप, महिलां उद्देग आनी समाजीक उद्देगांक मदत करप, डिजिटल आनी यांत्रिक मदत, मार्केट लिंकेज आनी हेर बाबतीत संस्था सेवा दितली.
ह्या भागीदारी खाला गोंय विधानसभेची तांक वाडोवपाक विधिमंडळ सहाय्य कार्यक्रम सुरू करतले. तशेंच आमदारां खातीर क्षमतावाड कार्यशाळा आयोजीत करतले. ज्ञान भागीदारी खाला शिक्षण खाते, उच्च शिक्षण आनी तंत्रशिक्षण खात्याक प्रशिक्षण, शिक्षणाचो दर्जो वाडोवप आनी शिक्षणाचे सक्षमीकरण करपाक संस्थे कडल्यान सहकार्य मेळटले.