भांगरभूंय | प्रतिनिधी
धिरयाचें आयोजन, सदोश मनीसवध प्रकरणांत पुलिसांचो अनवळख्या आड गुन्यांव
मडगांव: वार्का, बाणावले जेनिटो वाझ ह्या तरणाट्याक आयिल्लें मरण रेड्यान केल्ल्या हल्ल्यांत जालां. जेनिटो हाचे कुडीची मरणा उपरांतची तपासणी पुराय जाली आनी वैजकी अहवालांत हड्ड्यार जखम आसून काळजाक मार बशिल्ल्यान जेनिटोक मरण आयिल्ल्याचें स्पश्ट जालां. जेनिटोक मरण धिरया वेळार जाल्ल्यान कोलवें पुलिसांनी अनवळख्या आड मोनजात क्रुरताय कायदो, सदोश मनीस वधाचो गुन्यांव नोंद केला.
जेनिटो वाझ ह्या वार्काच्या तरणाट्याक मरण बाणावले आयोजीत केल्ल्या धिरया वेळार जाल्ल्याची चर्चा आशिल्ली. पूण जेनिटोच्या कुटुंबान हें न्हयकारून गोठ्यांतूच बैलान हल्लो केल्ल्याचें पुलिसांक सांगिल्लें. उपरांत कोलवें पुलिसांनी असैमीक मरण म्हूण नोंद करून फुडलो तपास सुरू केल्लो. बाणावले कुपवाडो दर्यादेग वाठारांत सोमारा सांजवेळा धिरयाचें आयोजन केल्लें. धिरया वेळार गडबडिल्ल्या रेड्यान जमावाच्या आंगार वचपाच्या यत्नांत जेनिटो वाझ हाचेर हल्लो केलो. व्हायरल व्हिडिओ प्रमाण एका रेड्यान जेनिटोचेर हल्लो केलो तेन्ना तो जमीनर पडलो.
त्या रेड्याच्या शिंगान जेनिटोच्या पांयाक गंभीर दुखापत जाली जाल्यार झुजाच्या आवेशांत आशिल्ल्या दुसऱ्या रेड्यानूय जेनिटोचेर हल्लो करून ताचेर केल्ल्या हल्ल्यात शींग हड्ड्यांत घुशिल्लें. जेनिटोक उपचारा खातीर खाजगी हॉस्पिटलांत व्हरतकूच ताका ताका मरण आयलें.
बैलाच्या हल्ल्यांत तरणाट्याक मरण आयिल्ल्याची म्हायती कोलवें पुलिसांक मेळ्ळी. कोलवें पुलिसांनी जेनिटोच्या कुटुंबा कडेन चवकशी केली तेन्ना तांणी जेनिटो हाका मरण आयलां आनी घरा शेजारच्या गोठ्यांतल्या बैलाक खावपाक घालपा खातीर गेल्ल्या जेनिटोचेर बैलान हल्लो केलो आनी तातूंतच तो जखमी जावन ताका मरण आयिल्ल्याचें सांगलें. ते प्रमाण कोलवें पुलिसांनी जेनिटो हाच्या मरण प्रकरणांत असैमीक मरण म्हूण नोंद करून तपासाक सुरवात केली.
मजगतीं, मंगळारा दक्षीण गोंय जिल्हो हॉस्पिटलाच्या मड्या कुडींत दवरिल्ल्या जेनिटो हाची मरणा उपरांतची तपासणी केली. वैजकी अहवालांत जेनिटोक मरण काळजाक मार बशिल्ल्यान जाल्ल्याचें स्पश्ट जालें. पुलिसांक वैजकी अहवाल मेळ्ळे उपरांत तांणी धिरयो आयोजन प्रकरणांत अनवळख्या आड मोनजात क्रुरताय कायद्या खाला, सदोश मनीसवध हे खातीर गुन्यांव नोंद केला. कोलवें पुलिसां कडल्यान तपासा वेळार धिरयाचें आयोजन केल्ल्यान मोनजात क्रुरताय कायद्या खाला गुन्यांव नोंद केल्ल्यान जेनिटोक मरण धिरया वेळार जाल्ल्याचें स्पश्ट जालें. ह्या प्रकरणाचो फुडलो तपास सुरू आशिल्ल्याचें पुलीस निरिक्षक थेरन डिकॉस्टा हांणी सांगलें.
बेकायदो धिरयांचेर कायदेशीर कारवायचे निर्देश: धानिया
जेनिटो वाझ हाच्या मरण प्रकरणांत कोलवें पुलीस योग्य तरेन तपास करतात. जेनिटो हाच्या कुडीची मरणा उपरांतची तपासणी जाल्या. अहवाल मेळ्ळे उपरांत फुडली कारवाय जातली. बेकायदो धिरयो आयोजन जायत आसल्यार कायदेशीर कारवाय करपाचे निर्देश हाचे पयलींच दक्षीण गोंयांतल्या पुलिसांक दिल्यात अशें दक्षीण गोंय पुलीस अधिक्षक अभिषेक धानिया हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
