भांगरभूंय | प्रतिनिधी
पणजी : उच्च माध्यमीक विद्यालयांनी 20 टक्के विद्यार्थी 3 किमी वाठारांतले घेवपाक जाय. हे विशींचें परिपत्रक जारी जालां. विद्यालया लागसारच्या विद्यार्थ्यांक प्रवेश मेळ्ळो ना, जाल्यार शिक्षण खात्या कडेन कागाळ करची, अशें मुख्यमंत्री डॉ. प्रमोद सावंत हांणी सांगलें.
नावेली आनी मडगांव वाठारांत उच्च माध्यमीक विद्यालयांचो उणाव आसा. लागच्या विद्यार्थ्यांक गुणांक लागून नावेलीच्या विद्यालयांत प्रवेश मेळना, असो मुद्दो आमदार उल्हास तुयेंकार हांणी मांडलो. ह्या वेळार डॉ. सावंत हांणी ही म्हायती दिली.
कांय उच्च माध्यमीक विद्यालयां चड गूण घेतिल्ल्या विद्यार्थ्यांकूच प्रवेश दिता. गूण उणे आशिल्ल्या विद्यार्थ्यांक लागींच्या उच्च माध्यमीक विद्यालयांनी प्रवेश मेळना, असो मुद्दो आमदार दिगंबर कामत हांणी मांडलो. सगळ्या विद्यार्थ्यांक उच्च माध्यमीक विद्यालयांनी प्रवेश मेळटलो. वोकेशनल फाट्यांत प्रवेश घेतलो तरी उपरांत पदवी मेरेनचें शिक्षण पुराय करपाक मेळटा. आतां वोकेशनल फाट्यांत पद्वी मेरेनचें शिक्षण सुरू जातलें, अशें डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
