जमनी विकून पयसो जोडपाची हांव गोंयाक काबार करतली !!!

भांगरभूंय | प्रतिनिधी

गोंयांत ज्यो कितें वायट गजाली चल्ल्यात त्यो गोंयच्या आनी गोंयच्या फुडाराक घातक थारूंक शकतात हें जांकां कळटा ते आपल्या तरेन ह्या गजालींचेर उलयतात. पूण तांकां खुद्द गोंयकारांचोच तेंको मेळना.

गोंयांत मीना खणीचो वेवसाय बंद जाले उपरांत आतां पर्यटन हो मुखेल वेवसाय म्हूण उबो रावला. गोंयच्या सरकारी येणावळींत ह्या वेवसायाचो व्हड वांटो अशिल्ल्यान ताका चडान चड उर्बा दिवपाक सरकारी पांवड्यार यत्न सुरू आसप स्वाभाविक म्हणचें पडटलें.
मीन वेवसायाक नेट आयले उपरांत तातूंत भुरटे वेवसायिक जशे रिगले आनी ह्या वेवसायाचें पाड घालें तीच परिस्थिती आतां पर्यटन वेवसायाची जातली काय कितें,अशी भिरांत तयार जाल्या. पर्यटन वेवसायाची बेशिस्त वाड जे तरेन सुरू आसा ती पळयत जाल्यार हो वेवसाय गोंयाक आनी गोंयकारांक गिळून उडयतलो,असो भास तयार जावपाक लागला. डिसेंबरांत ह्या पर्यटन वेवसायाक जी भरती येता ती पळयत जाल्यार गोंयकारांनी हुस्को करपा सारकीच परिस्थिती आसा. खरें म्हणल्यार डिसेंबराची दुसरी पंद्रस सरकारान सरकारी कर्मचाऱ्यांक भरपगारी सुटी दिवन घराच बसात अशें म्हणपाचें उरलां. खाजगी मळारूय ही पंद्रस कामगारांक घरा वचच्या परस आपल्या आस्थापनांच्या कुशीक खंय तरी तांची रावपाची वेवस्था करून ते वेळेर कामाक पावपाची तजवीज करची पडटली काय कितें,अशी भिरांकुळ परिस्थिती उप्रासल्या. घरांतल्यान भायर सरले उपरांत सदांची येवरादारीची कोयंडी, सगळे कडेन जाता ती गर्दी आनी तातूंतल्यान मनाची शांती इबाडपाची गजाल आतां सदचीच जाल्या. हे परिस्थितीचेर आतांच उपाय काडलो ना जाल्यार फुडारांत कितें पळोवचें पडटलें हें सांगू नज.
भारताच्या स्वातंत्र्या उपरांत १४ वर्सांनी गोंय भारता कडेन आयलें. गोंयाक मुक्ती मेळ्ळी अशें म्हूण आमी आमचें समाधान करतात खरें पूण कायद्यान भारतान गोंय ताब्यात घेतलें आनी आमी पुर्तुगीजांच्या राजवटींतल्यान मुक्त जाले. हांगासरली संस्कृती, भाशा, हांगासरली जीण आनी पुर्तुगीजां खाला इतलीं वर्सां काडिल्ल्यान गोंयकारांचें वेगळेंपण हें सदांच भारतांतल्या हेर लोकांक दिसपी आकर्शण. हांगां सरल्यो दर्यादेगो, देवळां, चर्ची आनी पिशें लावपी सैम हाका लागून हांगांसर येवपी पर्यटक पिसोच जाता. सुरवातेक हिप्पी संस्कृती हांगासर रूजली आनी विदेशी पर्यटकांचें एक आकर्शण म्हूण गोंया कडेन नदर गेली. ते उपरांत ह्या विदेशी पर्यटकांक पळोवपाचें आकर्शण म्हूण गोंयांत देशी पर्यटकांची झुंबड उडूंक लागली. तातूंत हेर राज्यां परस गोंयांत मेळपी सवाय सोरो, गोंयची खाद्य संस्कृती आनी मागीर पर्यटकांच्या गरजांप्रमाण वाडिल्लो ड्रग्ज, वेश्या वेवसाय हळूहळू आपली मुळां घट्ट करपाक लागलो. आतां कॅसिनो हे गोंयच्या पर्यटनाचे सगल्यांत व्हडलें आकर्शण जालां. सुरवातेक आपलें तोंड लिपोवन हळूच कॅसिनोंत वचपी तरणाट्यांची पिळगी आनी आतां बायलां, भुरग्यां सयत कॅसिनोंत वचपाक लागिल्ल्यो रांगो पळयत जाल्यार आतां पर्यटकांची रूची बदल्ल्या आनी गोंयांत येवन सोरो पिवप, ड्रग्ज घेवप, वेश्या वेवसाया कडेन आकर्शीत जावप ही स्टाईल जाल्या. मदलो कांय काळ हांगां सरल्या दर्यादेगेर सनबाथ म्हटल्यार सुर्याच्या किरणांनी उकते बसून दर्यांत न्हांवपाक लागून येवपी विदेशी पर्यटक आतां गोंयां कडेन व्हडलेशे येवपाक सोदिनात. पयलीं सारकें मेकळें वातावरण आतां तेंका मेळना आनी स्वताची मनरिजवण करपी विदेशी पर्यटकांची जागा आनी फोल्गां मारपी विदेशी पर्यटकांनी घेतल्या असोय बदल आमकां पळोवपाक मेळटा. हें सगळें चित्र पळयत जाल्यार हेर कडेन जीं फोल्गां मेळनात तीं गोंयांत मेळटात आनी ताका लागूनच गोंयांत येवपी पर्यटकांच्यो रूची आनी आवडी बदल्ल्यात. तातूंतल्यान गोंयचें पर्यटन दिशाहीन जायत चल्लां कांय कितें,असो प्रस्न उप्रासला.
फोल्गांचेर पयसो मोडपी देशी आनी विदेशी पर्यटकांच्या गिरायकांक लागून आतां तशा तरेचे नाईट क्लब, रिसोर्ट आनी हेर गजाली व्हडा प्रमाणांत येवंक लागल्यात. दर्यादेगेर दिल्लीवाल्यांनी आनी हेर व्हडल्या उद्योजकांनी जमनी विकत घेवन आपलीं आस्थापनां उबारल्यांत. जमनी विकून आनी हेर अनैतिक आनी बेकायदा गजालींक पालव दिवपाक लागून व्हडा प्रमाणांत पयशांचे वेव्हार सुरू जाल्यात. हातूंतल्यान आलायतो पयसो लोकां कडेन येवपाक लागला आनी ताचो परिणाम गोंयच्या सामाजिक, अर्थिक गजालींचेर जावपाक लागला. पर्यटन मळार गोंयकारांच्या शिक्षणाक मोल उरूंक ना. उच्च शिक्षण घेतलेल्या तरणाट्यांक हांगासर संद ना आनी तेका लागून हे तरणाचे गोंय सोडून हेर राज्यांनी, ना जाल्यार विदेशांत वचूंक लागल्यात. गोंयांत रावून सरकारी नोकरी मेळ्ळी जाल्यार बरी ना जाल्यार खाजगी मळारूय गोंयकारांच्या श्रमशक्तीक कांयच मोल उरूंक ना. पर्यटना कडेन संबंदीत बेकायदा आनी अनैतिक वेवसायान आपोआप फसून पयसो मेळोवपाची मानसिकता वाडत चल्ल्या आनी तेका लागून या गजालीं कडेन आतां गोंयकार संद म्हूण पळोवपाक लागला. ह्या गजालीं कडेन पळोवपाची गोंयकारांची नदर बदल्ल्या.
गोंयांत ज्यो कितें वायट गजाली चल्ल्यात त्यो गोंयच्या आनी गोंयच्या फुडाराक घातक थारूंक शकतात हें जांकां कळटा ते आपल्या तरेन ह्या गजालींचेर उलयतात. पूण तांकां खुद्द गोंयकारांचोच तेंको मेळना. गोंयची सामाजीक परिस्थिती इबाडत चल्ल्या आनी हें अशेंच चल्लें जाल्यार हें न मानवपी लोकांक गोंय सोडून वचचें पडटले अशी परिस्थिती आसा. 2075 मेरेन एक वेगळेंच गोंय पळोवंक मेळटलें. तातूंत नीज गोंयकार हो ह्या इन्वेश्टरांचो आनी तांच्या पयश्यांक भुलून प्रशासनांत आसपी भ्रश्ट राजकारण्यांचो गुलाम जावन भुंयारांत रावतलो अशें एक काल्पनीक चित्र ज्येश्ट पत्रकार मायाभूशण नागवेंकार हांणी आपल्या ऑनलाईन कादंबरींतल्यान चितारलां. ह्या कादंबरीचे भाग ऑनलाईन पद्दतीन प्रसिद्ध जातात. तांतूतल्या भागां कडेन पळयत जाल्यार ही कल्पना भविश्यांत सत्यांत उतरत जाल्यार कितें जातली, असो प्रस्न जागृत गोंयकारांच्या मनांत येवपाक शकता.
गोंयकारांची भाशा, संस्कृती हाचेर हांवळ येवप सुरूच आसा. स्थलांतरितांचो आंकडो वाडत चल्ल्यान गोंयकार आपल्याच भुंयेंत आतां अल्पसंख्य जावपाक लागला. एकी कडेन गोंयकार गोंय सोडून हेर राज्यांनी आनी विदेशांत वचपाक लागला आनी नोकरी, वेवसायाच्या संदीक लागून गोंया भायलो लोक गोंयांत येवपाक लागला. ही सामाजिक विशमता अशीच वाडत रावली जाल्यार गोंयची मूळ वळख आनी संस्कृती कालबाह्य जावपाक मात्तूय वेळ लागचो ना.
गोंयचें अस्तित्व उरपाक जाय जाल्यार गोंयची जमीन गोंयकारां कडेन उरूंक जाय. ही जमीनूच गोंयकारांच्या हातांतल्यान वचपाक लागल्या. झटपट पयसो मेळोवपाचें एकमेव साधन म्हूण जमीन वेव्हांरा कडेन पळयतात. राजकारणी सत्तेंत येवपाक धडपडटात ते हाकाच लागून. गोंयांतल्या चडशा राजकारण्यांचो धंदो जमीन वेव्हार आसा आनी जमनींतल्यान पयसो कमोवपाची ही हाव गोंयाक काबार करतली,अशी परिस्थिती निर्माण जाल्या.
हें सगळें आता खरेंच थांबोवपाक जातलें काय कितें? काय हे परिस्थितींतूच जगपाक शिकून हे फुडें दीस काडचे पडटले हाचो गंभीरपणान विचार करपाची वेळ आयल्या. निमणें घडटलें एकूच. सैमाचो एक नियम म्हटल्यार या गजालींक तोंड दिवन जो आपलें अस्तित्व तिगोवंक शकता तोच जगतलो आनी बारीक, गरीब, निराधार आनी परावलंबी मनीस गुलाम जातलो. आमच्या वांट्याक कितें येतां ते मुखार पळोवया…

किशोर नायक गांवकार
7774039242