जखमी लाडू नायक आरोंदेकार संवसाराक अंतरले
भांगरभूंय | प्रतिनिधी
20 दिसांनी ही दुसरी घडणूक
म्हापशें : फ्यूज बदलतना काल वीज खांब्या वयल्यान सकयल पडून जखमी जाल्ले विर्नोडा, पेडणेंचे लाडू नायक आरोंदेकार (33) हे लायन हॅल्पर आयज संवसाराक अंतरले. गोमॅकोंत तांकां उपचारा खातीर व्हेल्ले. उपचारा मजगतीं तांणी निमणो स्वास घेतलो.
पर्वरी सहाय्यक वीज अभियंता कार्यालयाचे कर्मचारी सोमारा दनपारच्या 12 वरांचेर सुकूर वाठारांत बंद पडिल्ली वीज पुरवण सुरळीत करपाक गेल्ले. ए. बी. स्विचांतलो फ्यूज गेल्ल्यान तो घालपाक तांचो एक वांगडी खांब्यार चडिल्लो. ताका फ्यूज घालपाक जमना जालें, हे खातीर आरोंदेकार खांब्यार चडले. फ्यूज घालपाचो यत्न करतना ताका शॉक बसलो आनी खांब्या वयल्यान सकयल पडलो. ताचे तकलेक जखम जाल्ली. सरकारी कर्मचार्यांनी अॅम्ब्युलन्सींतल्यान लाडूक बांबोळेच्या गोमॅकोंत दाखल केल्लो. थंय ताचेर उपचार चालू आसता तांकां मरण आयलें.
आरोंदेकार हे एका वर्सा आदीं वीज खात्यांत कामाक लागिल्ले. 3 म्हयन्यां आदीं तांचें लग्न जाल्लें.
मजगतीं, 19 जुलयाक कोलवाळे लाडू पेडणेंकार हांकांय खांब्या वयल्यान पडून मरण आयिल्लें. आतां ही 20 दिसां भितर दुसरी घडणूक जावन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
