चौगां आड आरोप निश्चीत करपाचो आदेश

भांगरभूंय | प्रतिनिधी

बल्लू मंजुनाथ गवंडर खून प्रकरण

पणजी: चिंबला भयणीच्या कुटुंबाचेर हल्लो करपा खातीर आयिल्ल्याचें समजले उपरांत तिचे मजतीक धांविल्लो मुरगन उर्फ बल्लू मंजूनाथ गवंडर हाचो खून केल्लो. ह्या प्रकरणांत पणजेंतल्या उत्तर गोंय जिल्हो आनी सत्र न्यायालयान दुबावीत लिंगनाथ रघुनाथ पालकार, प्रतिक्षा परशुराम गवंडर, परशुराम गवंडर, हेमंत पालकार ह्या चौगां आड आरोप निश्चीत करपाचो आदेश जारी केला. हे विशींचो आदेश अतिरिक्त सत्र न्यायाधीश एडगर फर्नांडीस हांणी दिलाे.

ह्या प्रकरणांत पोरणें गोंय पुलिसांनी 1 जून 2023 दिसा गुन्यांव दाखल केल्लो. ते प्रमाण दुबावीत परशुराम हाचो सख्खो भाव सुब्रह्मण्यम गवंडर हो शेजराच रावतालो. ह्या दोगां भावां मदीं मालमत्ते वयल्यान वाद सुरू आशिल्लो. ह्याच वादांतल्यान 31 मे 2023 दिसा दनपारां परशुराम आनी सुब्रह्मण्यम हांचे घरकान्नी मदीं झगडीं जाल्लीं. हीच तिडक मनांत धरून मध्यान रातीं काळखांत परशुराम, ताची घरकान्न प्रतिक्षा आनी तिचे दोन भाव लिंगनाथ आनी हेमंत हे सुब्रह्मण्यमाच्या घरा मुखार आयले आनी ताचे घरकान्नीक गाळी संवूक लागले. थंयच सुब्रह्मण्याचो 17 वर्साचो पूत आशिल्लो. दुबावितांनी ताचेर फातर मारून कानसुलार फुलयलें. हातूंत चल्याचे तकलेक जखम जाल्ली.

मजगतीं, भयणीच्या घराचेर तिच्याच भावजयीचे कुटूंब चाल करून आयिल्ल्याचें समजतकूच लागींच रावपी तिचो भाव मुरुगन उर्फ बल्लू मंजुनाथ गवंडर तांकां वाटावपा खातीर धांवून आयलो. त्या वेळार ताच्या हड्ड्यांत सुरो तोपिल्ल्यान बल्लूक मरण आयलें. ह्याच वेळार दुबावितांनी घडणूक थळा वयल्यान पळ काडलो.

ह्या प्रकरणांत बल्लूचो दुसरो भावोजी दीपेश माने हाणें पोरणें गोंय पुलिशेंत कागाळ दाखल केली. ते प्रमाण पोरणें गोंयचे पुलीस निरिक्षक सतीश पडवळकार हांच्या मार्गदर्शना खाला पुलिसांनी घडणूक थळार धांव घेतली. तशेंच तीन वेगळेवेगळे पंगड तयार करून दुबावितांचो सोद घेतलो.

मजगतीं, पुलिसांक दुबावीत लिंगनाथ, प्रतिक्षा, परशुराम हे 1 ऑगस्ट 2023 दिसा फांतोडेर सांपडले. जाल्यार सांखळे सावन चोर्ला घांटाचे दिशेन धांव मारपी हेमंत हाका पुलिसांनी अटक केली. उपरांत कागाळी प्रमाण पुलिसांनी वयल्या दुबावितां आड भादंसंच्या कलम 324, 504, 302, 506, 201 आरडब्ल्यू 34 खाला गुन्यांव दाखल केला. ह्या प्रकरणाची चवकशी पुराय करून पुलीस निरिक्षक सतीश पडवळकार हांणी दुबावीत लिंगनाथ रघुनाथ पालकार, प्रतिक्षा परशुराम गवंडर, परशुराम गवंडर, हेमंत पालकार ह्या चौगां आड पणजेंतल्या पयलो वर्ग न्यायालयांत 270 पानांचें आरोपपत्र दाखल केलां. खून प्रकरण सत्र न्यायालयाच्या अधिकारक्षेत्रांत येत आशिल्ल्यान पणजेंतल्या उत्तर गोंय जिल्हो आनी सत्र न्यायालयांत वर्ग केलां.

ह्या प्रकरणांत न्यायालयांत सुनावणी जाली तेन्ना न्यायालयान प्रथमदर्शनी पुराव्याची दखल घेवन वयल्या चारूय दुबावितां आड आरोप निश्चीत करपाचो आदेश जारी केला. ह्या प्रकरणाची फुडली सुनावणी 4 ऑक्टोबराक जातली.