भांगरभूंय | प्रतिनिधी
प्रवाशांक फटको; टायर फुटपाचे प्रकार वाडले; कर्नाटक सरकारान लक्ष घालपाची मागणी
वाळपय: गोंय कर्नाटक मजगतच्या कर्नाटक वाठारांतल्या रस्त्याची बिकट स्थिती जाल्या. कर्नाटक शिमेंतल्या रस्त्यार खूबशे कडेन फोंडकुलां पडल्यांत. ह्या फोंडकुलांनी वाहनां नादुरुस्त जावप, वाहनांचे टायर फुटप अशा प्रकारच्या समस्यांक वाहन चालक, प्रवाशांक सामकार वच्चें पडटा. खूबशा सुवातांनी रस्तो फोंडकुलांक लागून गायब जाला. चवथी पयलीं ह्या रस्त्याची दुरुस्ती केली ना जाल्यार हो रस्तो येरादारी खातीर पुरायपणान बंद जावपाची भिरांत वाहन चालकांनी उक्तायल्या.
गोंय-बेळगांव मजगतच्या चोर्ला घांट वाठारांतल्यान वेगळ्यावेगळ्या प्रकारची येरादारी जायत आसता. हो रस्तो बरो आशिल्ल्यान गोंयचे लोक व्हड प्रमाणांत बेळगांवां बाजारपेठे खातीर वचत आसतात. पूण कर्नाटक शिमेंतल्या रस्त्याची अवस्था दयनीय जाल्या. खूबशे कडेन फोंडकुलां पडिल्ल्यान रस्तो सोदचो पडटा. हाका लागून खूबशे फावटी वाहनांचे टायर फुटपाचे प्रकार घडूंक लागल्यात. पावसाचे सुरवेकूच कर्नाटक सरकारान कांय प्रमाणांत दुरुस्तीचें काम हातांत घेतिल्लें. पूण फाटल्या तीन म्हयन्यां सावन रस्त्यार मोटीं फोंडकुलां पडल्यात. सद्या ह्या फोंडकुलांनी उदक भरिल्ल्यान फोंडकुलांचो अदमास येना. हाका लागून वाहन चालकांक व्हड प्रमाणांत फटको बसूंक लागला.
गोंय शिमेंतलो रस्तो बरो आसा. पूण कर्नाटक शिमेंतलो रस्तो पिरणवाडी मेरेन पेड्डेर जाला. चवथी पयली ह्या रस्त्याचें ताकतिकेन काम करप सामके गरजेचें आसा. फोंडकुलांनी खडी घालून तीं पुरोवप गरजेचें जालां. नाजाल्यार हो रस्तो फुडारांत प्रवासा खातीर पुरायपणान बंद जावपाची भिरांत प्रवाशी आनी वाहन चालकांनी उक्तायल्या.
गोंय शीम ते पिरनवाडी हो सुमार 50 किलोमिटराच्या रस्त्यार ही परिस्थिती निर्माण जाल्या. हाचे कडेन सेगीतपणान लक्ष दिवप गरजेचें अशिल्लें. पूण अजून मेरेन लक्ष दिवंक नाशिल्ल्यान रस्तो पेड्डेर जावंक लागला.
मजगतीं, ह्या वाठारांतल्यान भाजयेची येरादारी करपी गोपाळ गावडे हांणी सांगलें, फाटल्या तीन म्हयन्यां सावन ह्या रस्त्याची अवस्था बिकट जाल्या. खूबशे फावटी थळावे सरपंच आनी आमदारांनी रस्त्याचे अवस्थे विशीं सरकाराक प्रस्नूय केलो. पूण सरकारान अजून मेरेन कानार हात दवरिल्ल्याची प्रतिक्रिया उक्तायली. खूबशे फावटी वाहनां दुरुस्त करपा खातीर बेळगांव वाठारांतल्यान मेकानीक हाडचे पडटात. अशे तरेचो फटको सेगीत बसूंक लागला.
सेगीत ह्या रस्त्यान बेळगांवां बाजार करूंक वचपी गोंयचे संतोष गांवकार हांणी म्हणलें, सुर्ला वाठारांत रस्त्याची अवस्था बिकट जाल्या. खूबशे फावटी कागाळी केल्यो. पूण सरकारान अजून मेरेन हाचे कडेन आडनदर केल्या. रस्त्यार मोटीं मोटीं फोंडकुलां पडल्यांत. ह्या फोंडकुलांनी उदक सांचिल्ल्यान रस्त्याचाे अदमास येना. हे खातीर वाहन चालकांक हाचो मोटो फटको बसता. कर्नाटक सरकारान जाता तितले बेगीन रस्तो दुरस्त करचो अशी मागणी गांवकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
