भांगरभूंय | प्रतिनिधी
पणजी: कॉलेज कॅम्पसांत चोरी केल्ल्याच्या प्रकरणांत बिट्स पिलानीच्या दोन विद्यार्थ्यांक उच्च न्यायालयान दोन म्हयने वृद्धाश्रमांत सामुदायीक सेवा दिवपाचो तशेंच दरेकी 50 हजारांचो दंड भरपाचो आदेश उच्च न्यायालयान दिला.
बिट्स पिलानीच्या कॅम्पसांत 14 ते 16 नोव्हेंबर 2023 ह्या काळांत जिनॉम परिशदेचें आयोजन केल्लें. परिशदेंतल्या स्टॉलांतल्यान बटाट चिप्स, चॉकलेट्स, सॅनिटायझर, नोटपॅड, पेन, मोबाईल फोन स्टँड, ब्ल्यूटूथ स्पिकर, डेस्क लॅम्प बी साहित्याची चोरी जाल्ल्याची कागाळ परिशदेचे जोड आयोजक प्रा. राजेश महेरोत्रा हांणी 15 नोव्हेंबर दिसा केल्ली.
उपरांत वेवस्थापनान सीसीटीव्ही कॅमेऱ्या वरवीं सोद घेतलो तेन्ना पांच विद्यार्थी आशिल्ल्याचें मुखार आयले. उपरांत बिट्स पिलानीच्या जोड निबंधकांनी ह्या पांचूय विद्यार्थ्यांची सेमिस्टर एक खातीरची नोंदणी रद्द करपाचो तशेंच पांचूय जाणांक दरेकी एक लाख रुपयांचो दंड दिल्लो. पूण उपरांत पांचांतल्या तिगांची सेमिस्टर एक खातीरची नोंदणी रद्द करपाची ख्यास्त वगळिल्ली. ताका लागून उरिल्ल्या दोन विद्यार्थ्यांनी आपले ख्यास्तीक उच्च न्यायालयांत आव्हान दिल्लें.
मजगतीं, ह्या प्रकरणांत उच्च न्यायालयांत सुनावणी जाली तेन्ना, त्या दोगांक अंतरीम आदेश दिवन दोनूय विद्यार्थ्यांक सेमिस्टर एक खातीर बसपाची परवानगी दिल्ली.
मजगतीं, उच्च न्यायालयान ह्या दोनूय विद्यार्थ्यांक 1 फेब्रुवारी सावन सद्दां दरेकी दोन वरां हे प्रमाण फुडले दोन म्हयने माजोड्डेंच्या वृद्धाश्रमांत सेवा दिवपाचो आदेश जारी केला. उपरांत दोन म्हयन्यांची वृद्धाश्रमांतली सेवा पुराय जाले उपरांत याचिकादारांक वयली जमा केल्ले रकमे मदलीं 50 हजारांची रक्कम परतून करपाचो आदेशूय न्यायालयान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
