भांगरभूंय | प्रतिनिधी
मडगांव, प्रतिनिधी : कब्रस्तानचे जमनीच्यो शिमो थारावपा खातीर पालिका अधिकार्यां सयत हेर अधिकारी मंगळारा हाजीर आशिल्ले. तेन्ना राय सरपंच आनी राय चर्चीचे ऍटर्नी विलियम्स बार्रेटो हांकां शिमो दाखयल्यो. मात, चर्च मालमत्तेचो योग्य नकासो आपल्या कडेन नाशिल्ल्यान सर्व्हे खात्या कडेन मालमत्तेचो सर्व्हे करपाची मागणी केल्या. ताका लागून शिमेचेर फातर दवरपाक आक्षेप घेतिल्ल्याचें बार्रेटो हांणी सांगलें.
मडगांव पालिका कब्रस्तान उबारपा खातीर यत्न करता. कब्रस्तानाचे जमनींत वचपाक वाट ना. एके वटेन फातोर्डाची चॅपेलची मालमत्ता जाल्यार दुसरे वटेन राय चर्चची मालमत्ता आसा. सर्व्हे करपा खातीर शीम दाखोवपाक राय चर्चच्या पदाधिकार्यांक आपयल्ले. मात ह्या वेळार सीमांकन करात पूण खुणेचे फातर दवरपाक आक्षेप घेतलो.
बार्रेटो हांणी सांगलें,, कब्रस्तानच्या जमीन मेजपाक (सीमांकना) सर्व्हे अधिकारी, पंचायत संचालक आनी हेर अधिकारी येतले अशें पालिका अभियंत्यांनी सांगून आपयल्लें. कब्रस्तानाच्या सीमांकना खातीर अधिकारी आयले. मात फातर दवरून खुणो करपाक तांणी विरोध केलो. कारण आजूनय चर्चीचे मालमत्तेचो योग्य नकासो आमचे कडेन ना. ताची मागणी केल्या. चर्चीचे जमनीची शीम आनी राय गावाची शीम एकूच आशिल्ल्यान ताचें सीमांकन करपाची मागणी केल्या. जमनीच्या शिमेचो वाद आशिल्ल्यान सीमांकना उपरांत फातर दवरपाक आक्षेप घेतलो. पालिका कब्रस्तान करता वा हेर कसल्याच मुद्यांचेर आमकां कसलोच आक्षेप ना. मात, चर्चीची जमीन तशीच उरची, तातूंत अतिक्रमण करचे न्हय, इतलेंच! अशें मत ऍटर्नी विलियम्स बार्रेटो हांणी सांगलें.
राय सरपंच पिटर क्वाद्रोस हांणी शिमेचेर खुणेचे फातर दवरपाक आक्षेप घेतलो. कारण चर्च मालमत्तेची शीम ही गावची शीम. ताका लागून सरपंच म्हणून आपणें गांवच्यो शिमो समजपा खातीर सीमांकन करपाची मागणी केल्या.
सर्व्हे अधिकारी श्रीकृष्ण सावंत हांणी कब्रस्तानाचे जमनीचें सिमांकन करता. चर्चीच्या पदाधिकार्यांनी नकाश्या प्रमाण सीमांकन करपाक सांगलें. पूण फातर उबारपाक आक्षेप घेतला. आतां पुलीस बंदोबस्त आशिल्ल्या फातर दवरतले अशेंय ताणें स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
