भांगरभूंय | प्रतिनिधी
म्हापशें, प्रतिनिधी : टेंबवाडो- मोरजेच्यान मोपा आंतरराष्ट्रीय विमानतळाचे दिकेन पर्यटकांक घेवन वचपी गोवा मायल्साच्या टॅक्सीकाराक आडावन बडयलो. ही घडणूक काल रातीं घडलीं. हे विशीं पेडणें पुलिसांनी 13 जाणांचेर गुन्यांव नोंद केला. हे विशीं टॅक्सीकार अल्लादीन मौलासाब कुंद्री (रा. मोती डोंगर, मडगांव) हांणी पेडणें पुलीस स्टेशनांत कागाळ नोंद केली.
चड म्हायती प्रमाण, पर्यटकांनी गोवा मायल्स अॅपा वयल्यान मोपा आंतरराष्ट्रीय विमानतळाचेर वचपा खातीर टॅक्सी बुक केल्ली. ते प्रमाण टेंबवाडा-मोरजेच्या एका हॉटेलांतल्यान पर्यटकांक घेवन काल रातच्या सुमार साडेबारांक ड्रायव्हर GA- 08- V- 7420 ह्या नंबराची टॅक्सी घेवन मोपा वटेन वतालो. तेन्ना वाटेर कांय जाणांनी टॅक्सी आडयली आनी ड्रायव्हराक गाळी संवपाक सुरवात केली. उपरांत ताका बडयलो. तशेंच जिवो मारपाची धमकीय दिल्ल्याचें कागाळदार कुंद्री हांणी कागाळींत सांगलां.
हे विशीं दखल घेवन पेडणें पुलिसांनी सुरेश सत्तोजी, संदीप बागकार, अमित नायक, सहदेव सप्तोजी, प्रणेश पुर्खे, वसंत सप्तोजी मेळून 13 जाणां आड गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
