भांगरभूंय | प्रतिनिधी
विश्वजीत राणे: कांक्रा हॉस्पिटल 16 म्हयन्यांत उबारतले
पणजी: थानाच्या कांक्राचेर प्रभावी थारपी 4.20 लाख रुपयांचें इंजेक्शन हाचे मुखार गोंय वैजकी म्हाविद्यालयाच्या हॉस्पिटलांत (गोमॅकॉ) फुकट मेळटलें. अशे तरेचें म्हारग इंजेक्शन फुकट दिवपी गोंय हें देशांतलें पयलें राज्य थारलां अशें भलायकी मंत्री विश्वजीत राणे हांणी स्पश्ट केलें.
संवसारीक कांक्र दिसा निमतान आयतारा गोंयचे पयले बायलेक हें इंजेक्शन दिलें. उपरांत घेतिल्ले पत्रकार परिशदेंत उलयतना मंत्री राणे हांणी ही म्हायती दिली. देशभरा सयत गोंयांतूय थानाच्या कांक्र दुयेंसां मदीं वाड जायत चल्ल्या. ताका लागून भलायकी खात्यान फाटल्या कांय वर्सांत एका लाखां परस चड बायलांची तपासणी केल्या. फुडल्या वर्सभरांत आनीक देड लाख बायलांची तपासणी करतले अशें राणे हांणी सांगलें.
देशभरांतल्या गरीब बायलांक भलायके विशीं आदार आनी मजत करपा खातीर प्रधानमंत्री नरेंद्र मोदी हांणी विवीध येवजण्यो आंखल्यांत. ताचाे लाव लाखांनी बायलां घेत आसात. थानाच्या कांक्रान पिडेस्त आशिल्ल्या गोंयच्या बायलांक अशे तरेचीं खर्चीक इंजेक्शनां घेवप शक्य ना. ताका लागून भलायकी खात्यान तांकां अशीं इजेक्शनां फुकट दिवपाचो निर्णय घेतला अशें मंत्री राणे हांणी सांगलें.
मजगतीं, गोंयांत स्वतंत्र कांक्रा हॉस्पिटलाची उबारणी फुडल्या 16 म्हयन्यांत जातली. हे खातीर टाटा मेमोरियला कडेन कबलात केल्या. गोंयांतल्या कांक्र पिडेस्तांक हाचे पयलीं उपचारा खातीर हेर राज्यांनी वच्चें पडटालें. पूण हें हॉस्पिटल सुरू जाले उपरांत तांकां सगले उपचार गोंयांतूच मेळटले अशें तांणी मुखार उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
