गोंय ‘गुन्यांव मुक्त’ जावंचें

भांगरभूंय | प्रतिनिधी

गोंय गुन्यांवाचें केंद्र करपा खातीर आमचें राज्य इतलें सवाय जालां? हांगां येवन गुन्यांव करपाक तांकां कसलोच भंय दिसना?

गोंयांत जावपी गुन्यांवांच्या तपासाची टक्केवारी देशांतल्या हेर राज्यां परस चड आसा अशें मुख्यमंत्री प्रमोद सावंत हांणी एक न्हय कितलेशेच फावटी सांगलां. घडये आसतूय. इतल्या जबाबदार पदा वयल्यान विधानां करताना तीं जबाबदारीनूच करचीं पडटात. खंयचोय गुन्यांव जालो म्हुणटकच ताचो सोद लागप गरजेचो. नाजाल्यार गुन्यांव करपी दुबाविताक एक गुन्यांव पचल्यार तो आनीक गुन्यांव करपाक शकता हाचो भंय आनी हुस्को घर खात्याक आसपाक जाय.
फाटल्या कांय वर्सांनी गोंयांत गुन्यांव वाडपाक लागल्यात हें कोणूच न्हयकारपाक शकना. कित्याक तर दर दिसा खबरांपत्रांनी वा सोशल मिडियाचेर असल्यो खबरो येतात. सोशल मिडियाचो प्रभाव वाडिल्ल्यान सरकारी यंत्रणां घडिल्ली घडणूक लिपोवपाकूय शकना अशी गत जाल्या. विदेशी पर्यटक जेन्ना गोंयांत येतात आनी तांचेर जर कसलोय अन्याय जालो जाल्यार ती खबर आंतरराष्ट्रीय मळार पावता आनी गोंयचें नांव बदनाम जाता. मागीर तांचें राजदूत कार्यालय ताची दखल घेवन आपल्या देशांतले लोक अमूक राज्यांत वा देशांत वतात जाल्यार खबरदारी घेवची म्हूण मार्गदर्शक तत्वां जारी करतात. हातूंतल्यान पर्यटन वेवसायाचेर परिणाम जाता. अश्यो गजाली गोंयांत घडल्यात. पोरूं एक जपानी नागरीक गोंयचें सैम पळोवपाक आयिल्लो. उत्तर गोंयच्या एका दर्यादेगेचेर रावपाक आशिल्ले कडेन ताका कांय दुबावितांनी आपूण पुलीस आशिल्ल्याचें सांगून लुटलो. ताणें पुलीस कागाळ करची न्हय म्हूण ह्या दुबावितांनी काळजी घेतली आनी तो परत आपल्या मायदेशांत वचतसर ताचेर नदर दवरली. पूण, जपानांत पावतकच ताणें घडिल्ली गजाल सोशल मिडियाचेर घाली आनी ती वाऱ्यार गेली. गोंय पुलिसांक रोखडोच तपासूय करचो पडलो. तेन्ना जपानच्या सरकारान आपल्या लोकांक सादूर केले आनी गोंयांत वतात जाल्यार चोरां कडल्यान काळजी घेयात अशें सांगलें. हाचो परिणाम थेट पर्यटनाचेर पडटा. त्या भायर गोंयचें नांव बदनाम जाता.
फाटल्या दोन तीन म्हयन्यांत अशींय प्रकरणां गोंयांत घडलीं, जंय आपल्याच फामिलेंतल्या वांगड्यांक कथीतपणान गोंयांत हाडून जिवेशी मारल्यांत. अशें जाता तेन्ना समाजा कडल्यान एक प्रतिक्रिया येता ‘‘हांकां गोंयूच मेळटा, मरपाक आनी मारपाक??’’… सर्वसामान्य मनीस ही तिडक उक्तायतना पुलिसांचेरय फोग काडटा.
गोंय गुन्यांवाचें केंद्र करपा खातीर आमचें राज्य इतलें सवाय जालां? हांगां येवन गुन्यांव करपाक तांकां कसलोच भंय दिसना? अशे साबार प्रस्न कोणाकूय पडटले. पुलीस अश्यो घडणुको गंभीरतायेन घेतात काय ना असोय प्रस्न उप्रासता. कित्याक तर पर्वरे एके चलयेक मारून रातोरात तिची कूड शिमे भायर वरून सावंतवाडींत उडोवपाचोय प्रकार कांय म्हयन्यां आदीं घडला. बरें! हो कथीत खून घडचे आदीं ते चलयेन दुबाविताचेर कागाळ केल्ली. दुबाविताक पुलिसांनी आपोवन हाडलो खरो, पूण ताका समजावन रोखडोच सोडलो. ताणें हे चलयेचेर आशिल्ल्या रागा भितर वचून ताका रोखडेंच मारलें. ही घडणूक पळयल्यार आमचीं पुलीस यंत्रणां कितलीं सदळ जाल्यांत तीं कळटात.
सध्या लोकसभेच्यो वेंचणुको सुरू आसात. कसल्योच वायट घडणुको घडच्यो न्हय आनी पयशांचें वांटप जावचें न्हय म्हूण पुलीस पॅट्रोलिंग करतले अशें आचारसंहिता लागू जाल्ली तेन्ना सांगिल्लें. सध्या कितले कडेन तुमकां ‘नाकाबंदी’ दिसता वा पुलीस पॅट्रोलिंग करतना दिसतात? फकत कांय कडेन वेंचणूक अधिकारी आनी पुलीस तंबू घालून बशिल्ले दिसतात.
राज्यांतले गुन्यांव नियंत्रणांत हाडटलो जाल्यार ‘बसून’ उपकारचें ना. सरकारी यंत्रणेन दोळ्यांत तेल घालून जागे रावंक जाय आनी कोणाचेरूय इल्लो लेगीत दुबाव आयल्यार कारवाय करपाक जाय. सादेपणान घेवंक जायना. जमीन बळकावच्या प्रकरणां विशीं जेन्ना लोकांनी कागाळी केल्ल्यो त्यो पुलिसांनी सदच्यो कश्यो धरल्यो आनी सदळपणां दाखयिल्ल्यान लोकांच्यो जमनी लुटल्यो अशें सरकारानूच म्हुणलां. ते खातीर पुलिसांनी खंयचीच गजाल सादेपणान घेवंक जायना, नाजाल्यार ‘‘जो मनीस पुलीस स्टेशनाचेर येवन कागाळ करता की अमूक मनीस आपले घरकान्नी फाटल्यान लागला म्हूण, आनीक जर पुलिसांनी ती कागाळ ‘दुबाविताच्या बरेपणाक’ लागून फाफडून उडयली जाल्यार मागीर कागाळदार स्वता पिस्तूल हातांत घेता’’. कित्याक तर ताचो पुलिसां वयलो विस्वास उडटा. हालीं तेंपार पुलिसांची जीं निलंबना जातात तीं पळयल्यार पुलिसांचेर विस्वास दवरपाचो काय कितें असोय प्रस्न लोकांक पडला आसतलोच. नव्यान पुलीस सेवेंत रुजू जाल्ले पुलीस लेगीत केदे व्हडले पराक्रम करतात!!!
चोरयो, खून, हे गोंयां खातीर आतां अजाप न्हय. पूण ल्हान ल्हान भुरग्यांचेर ज्यो आगळिको जातात, त्यो लेगीत थांबनात. पयर वास्को अशाच पांच वर्साच्या चली भुरग्याचेर आगळीक करून ताचो गळो दाबून ताका जिवेशीं मारलें. आवय- बापायचेर कितें कोसळ्ळें आसतलें तें चितल्यार संवेदना आशिल्ल्या मनशाच्या दोळ्यांतल्यान दुकां गळपाकूच जाय. आतां तपास जावन गुन्यांव करतल्यांचो सोद लागतलो आनी सरकार म्हुणटलें आमचें राज्य गुन्यांव सोदपाक देशांत ‘पयलें’… तपास करपांत ‘नबर वन’ जावन त्या फामिलेक कांयच फायदो ना, कित्याक तर जांचो मनीस मरून गेला तो परत येवचो ना, जांचेर शस्त्रांचे घाय जाल्यात तांच्या तकलेंतल्यान तो भंय वचचो ना. गरज आसा ती गुन्यांव मुक्त गोंय करपाचें… आळसाय करून, दुबावितां वांगडा हातमेळोवणी करून तें जावचें ना, तांच्या हातांक बेडयो घालच्यो पडटल्यो आनी नव्यान गुन्यांव घडचे न्हय म्हूण ‘कायद्याचो भंय’ तयार करचो पडटलो. गुन्यांवकारांक जल दिल्यार, गुन्यांव थांबतले???

समीर नायक
मडगांव