भांगरभूंय | प्रतिनिधी
देशांत गोडेंमूत दुयेंतींचें प्रमाण ११ टक्के : डॉ. अमीत डायस
पणजी : देशांत २० वर्सांवेल्या गोडेंमुत (डायबेटीस) दुयेंतींचें प्रमाण गोंयांत सगळ्यांत चड म्हणल्यार २६.४ टक्के आसा. देशांत हें प्रमाण ११ टक्के आसा. गोडेंमूत तशेंच देमेशिया (स्मृतीभ्रंश) सारक्या दुयेंसां पसून वाटवपा खातीर गोंयकारांनी जिणे पद्दतींत बदल करपाची गरज आसा, अशें गोंय वैजकी म्हाविद्यालय हॉस्पिटलांतले साहाय्यक प्राध्यापक डॉ. अमीत डायस हांणी सांगलें.
पोरणें गोंयां आयतारा गोंयांतल्या पयल्या असिस्टेड केर सेंटराचे (आजी केर) उक्तावण जालें. उपरांत डॉ. डायस हांचें ‘एजींग ग्रेसफुली : अनलोकिंग द सीक्रेटस टू ब्रेन हेल्थ’ ह्या विशयाचेर भाशण जालें. ह्या भाशणांत उलयतना तांणी गोडेंमूत दुयेंसाविशीं ही म्हायती दिली. प्रसाद भिडे हे आजी केर सेंटरचे संस्थापक आसा. जाण्टे तशेंच दुयेतींची रावपा सयत तांचेर उपचार करपाची सुविधा पोरणें गोंयच्या आजी केर सेंटरांत आसा.
चड वेळ संगणकाचेर काम करप, व्यायाम नासप, शारिरीक कामाचो उणाव आनी अयोग्य आहार (जेवण) ही डेमेंशिया (स्मृतीभ्रंश) वा गोडेंमूत (डायबेटिस) जावपा फाटलीं मुखेल कारणां आसात. हाचेर उपाय म्हणल्यार नेमान चलपा सारखो व्यायाम करपाक जाय. व्यायामा सयत मेंदू ताजो रावपा खातीर ताचो सेगीत वापर जावपाक जाय. वाचन, चिंतन, संगीत आयकप ह्यो सारक्यो कार्यावळी करीत रावपाक जाय. थारावीक पिराय जाली काय भलायकी नेमान तपासपा सयत दोतोराच्या सल्ल्यान आहार घेवपाक जाय. गोंयांत डेमेंशियाचे (स्मृतीभ्रंश) लागीं लागीं ५ हजार दुयेंती आसा. गोडेंमुता उपरांत देमेंशियाचो धोको वाडत आसा, अशें डॉ. डायस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
