भांगरभूंय | प्रतिनिधी
पणजीः केप्यां एका बंद घरांत आवय- धुवेची कूड कुशिल्ले अवस्थेंत मेळिल्ल्यान वाठारांत बोवाळ पडला. शेनवारा ही घडणूक उजवाडाक आयली. अलका दत्ताराम शिरवयकार (77) आनी अनार दत्ताराम शिरवयकार (42) अशीं तांचीं नांवां. घरांत तीं दोगांच रावतालीं. घरांतल्यान घाण येता म्हूण थळाव्यांनी पुलिसांक फोन केलो आनी उपरांत ही धक्को दिवपी घडणूक उजवाडाक आयली.
मेळिल्ले म्हायती प्रमाण, केपें पुलिसांनी घडणूक सुवातेर वचून दार तोडलें तेन्ना दोगांय मेल्ले अवस्थेंत मेळ्ळ्यो. आवयची कूड खाटीचेर आसली, जाल्यार चलयेची कूड फासाक लोंबकळटाली. मजगतीं, कामाक लागून उत्तर गोंयांत रावपी पुताक हे विशीं म्हायती दिल्या. प्राथमीक चवकशे उपरांत पुलिसांनी ही घडणूक ‘असैमीक मरण’ म्हूण नोंद केल्या.
आवयच्या सैमीक मरणा उपरांत डिप्रेशनाक लागून चलयेन आत्महत्या केल्ली आसूं येता असो सुरवातीचो दुबाव पुलिसांनी उक्तायला. ह्या प्रकरणाची चवकशी केपें पुलीस स्टेशनाचे निरिक्षक प्रशल नायक देसाय हांच्या फुडारपणा खाला बायल उपनिरिक्षक दीपा दयेकार करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
