भांगरभूंय | प्रतिनिधी
पणजीः देवी श्रीलयराईचे जात्रे निमतान सुरक्षा, नितळसाण आनी थळाची पवित्रताय तिगोवन दवरपाचे नदरेन प्रशासनान म्हत्वाचो निर्णय घेतला. आतां लयराई देवीचे तळयेंत न्हांवपाक सामान्य लोकांक पुरायपणान बंदी घाल्या. फकत धोंडांक न्हांवपाक परवानगी दिल्या. हे संबंदी खर आदेश जारी केल्यात आनी नेम मोडपी लोकां आड कायदेशीर कारवाय करपाची शिटकावणी दिल्या.
हें पावल मुखेलपणान तळयेंतल्या उदकाची नितळसाण सांबाळपा खातीर, उदका संसाधनांची राखण करपा खातीर आनी लोकांची सुरक्षीतताय सुनिश्चीत करपा खातीर उखल्लां. लयराई देवीच्या तळयेक धर्मीक म्हत्व आसा. खासा करुन जात्रेच्या वेळार धोंडां खातीर ही तळी पवित्र मानतात. हे सुवातेर गर्दी जावची न्हय आनी ताका लागून उदकाचें प्रदुशण जावचें न्हय हे खातीर प्रशासनान हें निर्बंध घाल्यात.
मेळिल्ले म्हायती प्रमाण, तळयेचे वाठारांत सीसीटीव्ही कॅमेरे बसयल्यात आनी ताचे वरवीं पुराय वाठाराचेर नदर दवरतात. तशेंच तळयेच्या देगेर सुचोवण्यांचे तकटे लायल्यात. ताचेर “तळयेत फकत धोंडांक न्हांवपाक परवानगी आसा, हेर कोणाकूच ना. तसो करतना कोणूय मेळ्ळ्यार ताका 1000 रुपया दंड भरचो पडटलो” अशें नमूद केलां.
जात्रे खातीर उत्तर गोंय जिल्होधिकाऱ्यांनी खाशेली जतनाय घेतल्या. 21 एप्रील सावन सुरू जावपी हे जात्रेंत कायदो आनी सुवेवस्था सांबाळपा खातीर कार्यकारी दंडाधिकारी आनी भरारी पंगडांची नेमणूक केल्या.
देवस्थान समिती आनी प्रशासनानय भक्तांक आनी पर्यटकांक हें नेम पाळचे असो उलो केलां. ह्या आदेशाचें उल्लंघन केल्यार कारवाय करतले अशेंय स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
