भांगरभूंय | प्रतिनिधी
डॉ. प्रमोद सावंत: नोव्हेंबरांत दक्षीण गोंयांत बाल चित्रपट महोत्सव
दिवचल: गोंयांत सिनेमा तयार करपाचें प्रशिक्षण घेतल्यार खूबशो संदी उपलब्ध जातल्याे. गोंयांत फिल्म सिटी उबारपाची प्रक्रिया सुरू जावन मिनी सिटी उबारतले. तशेंच नोव्हेंबर म्हयन्यांत दक्षीण गोंयांत भव्य असो बाल चित्रपट महोत्सव आयोजीत करतले अशी म्हत्वपूर्ण घोशणा मुख्यमंत्री डॉ. प्रमोद सावंत हांणी सांखळेंत केली.
फिल्म टेलिव्हिजन अकादमी इन गोवा मिडिया वतीन आयोजीत केल्ल्या फिल्म मेकींग कार्यशाळेच्या उक्तावणा वेळार ते उलयताले.
रवींद्र भवन सांखळेंत आयोजीत केल्ले हे कार्यावळींत आमदार प्रेमेंद्र शेट, नगराध्यक्षा रश्मी देसाय, म्हायती खात्याचे दीपक बांदेकार, कुंदन फळारी, गोपाळ सुर्लकार, विठोबा घाडी, अनील लाड बी मानेस्त हाजीर आशिल्ले.
फिल्म प्रशिक्षण घेत जाल्यार खूबशो संदी उपलब्ध आसात. ताचो सगल्यांनी लाव घेवप गरजेचें आसा. सरकारी नोकरे फाटल्यान धांवनासतना विवीध संदीचो लाव घेवपाचें आवाहन डॉ. प्रमोद सावंत हांणी केलें.
गोंयकार सुसेगाद जायत आसात. गोंया भायले लोक खूबशा संदीचो लाव घेत आसात. तेच बरोबर गोंयच्या लोकांक लुबाडपाचो प्रकारूय खूबशे फावटी जाला. ताका लागून लोकांनी जागृत रावन गोंयकारांनी उपलब्ध आशिल्ले संदीचें भांगर करचें अशें आवाहन मुख्यमंत्र्यानी केलें.
हे कार्यशाळेंत 42 जाणांनी नोंदी केल्यात. चडांत चड लोकांनी, भुरग्यांनी हाचो लाव घेवचो अशें आवाहन डॉ. प्रमोद सावंत हांणी केलें. तशेंच गोंयच्या सगल्या म्हालांनी अश्यो कार्यशाळा आयोजीत करतले अशी घोशणा मुख्यमंत्र्यांनी केली.
फिल्म मेकींगचो कोर्स उपेगी आसा आनी तातूंत खूबशो संदी आसात. तशेंच गोंयांत पोशक वातावरण आशिल्ल्यान तरणाट्यांनी हे संदीचो लाव घेवचो अशें आवाहन मयेंचे आमदार प्रेमेंद्र शेट हांणी केलें.
ह्या वेळार सांखळेच्यो नगराध्यक्षा रश्मी देसाय हांणी उपक्रमाचें अभिनंदन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
