भांगरभूंय | प्रतिनिधी
-बायलां खातीर येवजण राबोवती कर्नाटक देशांतले दुसरें राज्य
जोयडा : वाडट्या म्हारगायेचो सर्वसामान्यांक फटको बसता. तांकां आदार दिवपी देशांतली सगल्यांत व्हड येवजण म्हूण बायलां खातीर म्हयन्याक 2 हजार रुपया दिवपी ‘गृहलक्ष्मी’ येवजण कर्नाटक सरकारान बुधवारा चालीक लायल्या. ताका लागून बायलां खातीर अशी येवजण राबोवपी कर्नाटक देशांतलें दुसरें राज्य आसा. तेच प्रमाण अशा प्रकारची येवजण राबोवपी गोंय देशांतले पयलें राज्य आसा.
2012 त मनोहर पर्रीकार हांणी गोंयचे मुख्यमंत्री आसतना दोन व्हड येवजण्यो राबयिल्लो. तातूंतले एक म्हणल्यार पेट्रोलाचे दर 14 रुपयांनी उणे केल्ले आनी म्हारगाय भत्तो म्हूण गृहआधार येवजणे खाला गोंयांतल्या बायलांक म्हयन्याक एक हजार रुपया दिवप. तातूंत गृहआधार येवजण अजुनूय सुरू आसून आतां बायलांक म्हयन्याक देड हजार रुपया दितात.
गोंयांत दिगंबर कामत हांचें सरकार आसतना विरोधी पक्षफुडारी म्हूण भाजपाचे मनोहर पर्रीकार आशिल्ले. त्या वेळार वाडटे म्हारगायेचेर बोट दवरून तांणी काँग्रेसच्या कामत सरकाराक घेरांव घातिल्लो. गॅसचे दर वाडलें, भाजयो, कड्डणांचेय दर वाडिल्ल्यान सर्वसामान्यांक फटको बसतालो. अशा वेळार तांकां थाकाय मेळची म्हूण 2012 विधानसभा वेंचणुकेंत गृहआधार येवजणेची घोशणा करून काँग्रेस सरकाराक सत्ते वयल्यान सकयल हाडिल्लें. सत्तेर येवन मुख्यमंत्री जाले उपरांत पर्रीकार हांणी नोव्हेंबर 2012 त गृहआदार येवजणेक चालना दिल्ली. हे येवजणेंत कनिश्ठ आनी मध्यमवर्गीय कुटुंबांतल्या बायलांचो आस्पाव केल्लो. येवजणेची आयजूय अंमलबजावणी जाता. बायलांक म्हयन्याक देड हजार रुपया मेळटात.
तेच फाटभुंयेर कर्नाटकांत 2023 चे विधानसभा वेंचणुकेंत काँग्रेसीन गृहलक्ष्मी येवजणे सयत पांच येवजण्यो जाहीर करून भाजपाक हारयिल्लो. उपरांत देशांतली सगल्यांत व्हड येवजण म्हूण बायलांक म्हयन्याक 2 हजार रुपया दिवपाची ‘गृहलक्ष्मी’ येवजण चालीक लायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
